Almaty ákimi Keńsaı-3 zıratynyń ornyna saıabaq salý týraly ótinishke jaýap berdi

ALMATY. QazAqparat - Almatydaǵy «Dýman» yqshamaýdanynyń turǵyndary «Keńsaı 3» zıratynyń salynýyna qarsy. Olar Erbolat Dosaevtan onyń ornyna saıabaq aımaǵyn qurýdy surady, dep habarlaıdy QazAqparat tilshisi.

«Máseleniń ońaı emes ekenin aıtqym keledi, biz qazir sheshý joldaryn qarastyryp jatyrmyz. Ókinishke qaraı, Keńsaı-2-de jer ýchaskesi joq. Baǵanashyl, Buryndaıdaǵy basqa da zırattar toly. Qazir biz Almaty oblysymen birlese otyryp jer ýchaskesin qarastyryp, izdep jatyrmyz»,- dedi Erbolat Dosaev Medeý aýdany turǵyndarymen kezdesý barysynda.

Sonymen qatar ol qaladan 100 gektar jer tabý ońaı sharýa emes ekenin aıtty.

«Bul másele týraly bilemin. Ózim de birneshe ret baryp kórdim. Eger basqa joldary tabylyp jatsa, saıabaq aımaǵyn quramyz. Ázirge, eshteńe aıta almaımyn. Biraq bul máselemen meniń orynbasarym aınalysyp jatyr. Shilde aıynyń basyna deıin biraz málimet alamyz dep úmittenemiz», - dep jaýap berdi ákim turǵyndar saýalyna.

Buǵan deıin ákimdik «Dýman» yqsham aýdanynyń ońtústigi, «Keńsaı» zıratynyń shyǵysy mekenjaıynda aralas úlgidegi zıratty uıymdastyrý úshin aýdany 92,08 ga ýchaske bólingeni týraly habarlaǵan bolatyn.