Almaty ákimi qaza tapqan polıtsııa qyzmetkeriniń otbasyna baryp, kóńil aıtty
ALMATY. QazAqparat - Búgin Almaty qalasynyń ákimi Baýyrjan Baıbek lańkestikke qarsy operatsııa barysynda qaza tapqan polıtsııa starshınasy, 42 jastaǵy Aıan Ǵalıevtiń otbasyna baryp, marqumnyń týǵan-týystaryna qaıǵyryp kóńil aıtty.
Bul týraly Almaty ákiminiń baspasóz qyzmetinen habarlady.
Qala basshysy otbasy múshelerine kóńil aıtyp, Aıan Ǵalıevtiń beıbit turǵyndardyń ómirin saqtap qalý úshin óz ómirin qurbandyqqa shalyp, erlik kórsetkenin atap ótti.
«Sizdiń ulyńyz erlik kórsetti. Biz sizderge barlyq qajetti kómekterdi kórsetetin bolamyz. Almaty oblysynyń ákimimen habarlastym. Qazir jumys júrgizilip jatyr. Bekem bolyńyzdar. Sizdiń ulyńyzdyń erligi eshqashan umytylmaıdy. Ol bizdiń batyrymyz», - dedi marqumnyń anasyna B. Baıbek.
Elbasynyń tapsyrmasyna sáıkes, lańkestik áreket saldarynan qaza tapqandardyń otbasyna 15 mln. teńge kóleminde materıaldyq kómek kórsetiledi.
Esterińizge sala ketelik, Almaly aýdany boıynsha Memlekettik kirister departamentinde kúzette turǵan starshına Aıan Ǵalıev jol-patrýldik polıtsııa qyzmetkerlerine oq jaýdyryp, Abylaı han dańǵyly boıymen tómen qaraı ketip bara jatqan qylmyskermen atysady. Sonyń saldarynan ólimshi bolyp jaralanady. Biraq, qulap jatyp, qylmyskerdi jaraqattap úlgergen. Artynsha kelip jetken Aıannyń áriptesi qylmyskerdi ustap, qolyna kisen salady. Qazir qylmysker tergeý abaqtysynda.
Tergeý júrgizilip jatyr.
