Almaty ákimi qaýipti aımaqtan kelgenderdi baqylaýdy kúsheıtýdi tapsyrdy
ALMATY. QazAqparat – Almaty ákiminiń orynbasary Erjan Babaqumarov qalany zararsyzdandyrý quralymen qamtıtyn qyzmetterdiń jumysyn synǵa aldy, dep habarlaıdy QazAqparat tilshisi.
Búgin qala ákimi Baqytjan Saǵyntaevtyń tóraǵalyǵymen epıdemııaǵa qarsy sharalardy kúsheıtý týraly otyrys ótti.
Qazir álemde 103 elde COVID-2019 juqpasy tirkelgen.
Arnaıy qurylǵan shtabtyń tóraǵasy – Almaty ákiminiń orynbasary Erjan Babaqumarovtyń aıtýynsha, Almatyda koronavırýs juqpasynan saqtandyrý sharalary kúsheıtilip jatyr.
Táýlik boıy kelip jatqan halyqaralyq áýe reısteri baqylaýǵa alynǵan. Áýejaıda kún saıyn 25 sanepıdemıolog, 8 sanıtarlyq karantın qyzmetkeri jumys isteıdi. 1 aqpannan bastap 1 140 áýe reısine qyzmet kórsetildi, ondaǵy 250 myń jolaýshy tekserildi.
Qazir Almatyda medıtsınalyq qyzmetkerlerdiń baqylaýynda 12 412 adam bar.
Qaýipti elden kelgender arnaıy medıtsınalyq obektilerge oqshaýlandy. Olardan alynǵan 690 testiden bir de bir nátıje rastalǵan joq.
Sondaı-aq, juqpa taralǵan elderden keletin eńbek mıgranttaryna ruqsat berý toqtatyldy.
Dári-dármekpen qamtamasyz etý, medıtsınalyq buıymdar men jeke qorǵaný quraldary boıynsha QR Densaýlyq saqtaý mınıstrligimen birlesken jumys júrgizilýde.
Profılaktıka aıasynda barlyq qoǵamdyq oryndardy sanıtaızerlermen qamtamasyz etý týraly usynys berildi. 202 mektepte, 183 balabaqshada, qosymsha 18 bilim berý uıymdarynda, 20 kolledjde 1 859 antıseptık ornatyldy. Metropolıtende de jumystar bastaldy.
Sonymen qatar, shtab tóraǵasy Erjan Babaqumarov búgingi kúni dezınfektsııalyq jáne antıseptık quralymen jabdyqtaý jumysy barlyq uıymdarda tolyq atqarylmaı otyrǵanyn aıtty.
Jeke menshik bilim berý mekemeleri, ýnıversıtetter, bazarlar, HQKO, meshitter, bank pen «Qazposhta» bólimsheleri, avtovokzaldar, qonaq úıler, kınoteatrlar, qoǵamdyq kólikti zararsyzdandyrý sharalary kóńil kónshiterlik emes. Olar Almaty qalasy taýarlar men qyzmetterdiń sapasy men qaýipsizdigin baqylaý departamentiniń derekterin, zararsyzdandyrý jáne antıseptıkalyq óńdeý jónindegi bazalyq usynystardy tolyq kólemde oryndamaıdy.
Jıyndy qorytyndylaı kele Almaty qalasynyń ákimi Baqytjan Saǵyntaev profılaktıkalyq jáne epıdemııaǵa qarsy is-sharalardy sapaly júzege asyrý boıynsha barlyq sharalardy qolǵa alýdy, qaýipti aımaqtardan keletin adamdardy baqylaýdy kúsheıtýdi tapsyrdy.
