Almaty ákimi karantınniń kúsheıtilýine baılanysty turǵyndarǵa úndeý joldady
ALMATY. QazAqparat – Almaty ákimi Baqytjan Saǵyntaev qaladaǵy karantın talaptaryna qatysty túsinik berdi, dep habarlaıdy QazAqparat tilshisi.
Onyń aıtýynsha, Úkimet otyrysynan soń qalada qaýipsizdik sharalary kúsheıtile túspek.
«Qaýipti indettiń ýshyǵa túsýine baılanysty Úkimet epıdjaǵdaıdy turaqtandyrý boıynsha jańa sharalardy qolǵa aldy. Osy oraıda Almatyda da karantın rejımin kúsheıtý boıynsha qosymsha sharalar qabyldandy.
Senbi-jeksenbi, ıaǵnı 20-21 maýsym kúnderi iri saýda jáne qyzmet kórsetý nysandarynyń qyzmeti toqtatylady. Buǵan qosa saıabaqtar, skverler men jaıaý júrginshiler aımaǵy, ózender men sý qoımalarynyń jaǵalaýlary, taý shańǵysy kýrorttary jáne basqa da qoǵamdyq oryndar jabylady», - dedi ol áleýmettik jelidegi paraqshasynda .
Ákim karantın sharalaryn bosańsytý COVID-19-dyń órshýine ákep soqqanyn aıtty.
«Osyǵan baılanysty qala turǵyndaryn bul jumystarǵa túsinistikpen qaraýǵa shaqyramyn. Karantın sharalaryn bosańsytý – COVID-19-dyń órshýine ákep soqty. Qala turǵyndarynan kóshede júrýin shektetýin suraımyz. Ásirese qart adamdardyń úıde otyrǵany abzal. Qaýipi dendep bara jatqan myna aýrýdy tunshyqtyrý ózimizge baılanysty ekenin esten shyǵarmaıyq. Barlyq týyndaǵan suraqtar boıynsha 1308 nómirindegi call-ortalyqqa habarlasýǵa bolady», - dedi qala basshysy.
Buǵan deıin QR Premer-Mınıstri Asqar Mamınniń tóraǵalyǵymen QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysy ótkenin jazǵan edik. Onda QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologııalyq jaǵdaıdy turaqtandyrý boıynsha qosymsha sharalar qaraldy.
