Almaty ákimi qańǵybastardyń qaıda ketkenin túsindirdi
ALMATY. QazAqparat – Almaty ákimi Baqytjan Saǵyntaev qalada kóshede júrgen úısizderdi qaıda jibergenin túsindirdi, dep habarlaıdy QazAqparat tilshisi.
«Turǵylyqty mekenjaıy joq tulǵalarǵa qatysty saýaldar kóp boldy. Olar dalada qaldy, eshkimge keregi joq, tipti qalanyń syrtyna shyǵaryp jiberdi degen qaýeset te boldy. Bul másele bizdiń nazardan tys qalǵan joq. Biz olardyń qozǵalysyn baqylap otyrmyz», - dedi Baqytjan Saǵyntaev.
Ákimniń aıtýynsha, olarǵa arnap shatyr qurylyp, 300 oryndyq qalashyq jasaldy.
«Olarǵa arnap kereýet, tósek jaı, kıim-keshek, azyq-túlik daıyndaldy. Aınalasyna blokpost qoıdyq. Jaryqtandyrý ornattyq. Osy adamdardyń keıbirin qarttar úıine ornalastyrýdy oılastyryp jatyrmyz. Arasynda jumys isteýge nıet bildirgenderdi jumyspen qamtýdyń jol kartasyna sáıkes qyzmetke qabyldap jatyrmyz. Olar nazardan tys qalǵan joq», - dedi ákim.
