Almaty ákimi qalanyń jol ınfraqurylymyn qaıta jasaý barysyn tekserdi
ALMATY. QazAqparat - Almaty qalasynyń ákimi Baýyrjan Baıbek qalanyń jol ınfraqurylymyn salý jáne qaıta jasaý barysyn tekserdi, dep habarlaıdy QazAqparat tilshisi.
Baýyrjan Baıbek Áýezov kóshesi boıymen Tımırıazev kóshesinen Gogol kóshesine deıingi 3,6 shaqyrymdyq aýmaqty jóndeý jumystarynyń barysyn tekserdi. Bul ýchaskedegi jóndeý jumystary 12 tamyzda aıaqtalady dep josparlanǵan.
Bıyl qalada 146 km jol jóndelip, 97 myń sharshy metr trotýar abattandyrylady. Sondaı-aq, qalada BRT men Orbıtadan Kókbazarǵa deıingi aýmaqty qamtıtyn 21 shaqyrymdyq velodáliz qurylysy júrip jatyr.
Avtomobıl joldary basqarmasynyń aqparaty boıynsha Jeltoqsan kóshesiniń Tımırıazev kóshesinen Tóle bı kóshesine deıingi 2,3 shaqyrymdyq bóligi sonymen qatar Tóle bıden Raıymbek dańǵylyna deıingi 2,08 shaqyrymdyq bóliginde jóndeý jumystary aıaqtalyp qaldy.
Almatynyń ákimi Ótepov kóshesi boıymen Rozybaqıev kóshesinen Atakent kórmesine deıingi aýmaqty jóndeýdiń sapasyn da tekserdi. Atalǵan nysanda tramvaı relsteri alynyp, asfaltbeton tóselgen, jańa velosıped aımaǵy paıda bolǵan. Jolaýshylar kóligi jáne avtomobıl joldary basqarmasynyń málimeti boıynsha bul ýchaskege on kún ishinde jol belgileri qoılatyn bolady.
Qala basshysy jumys sapary barysynda Toraıǵyrov jáne Kablýkov kóshelerinde júrip jatqan jóndeý jumystarymen tanysty. Almaty ákimi jol ınfraqurylymyn salý men qaıta jasaýda jaıaý júrginshi aımaqtaryna jete nazar aýdarý qajettigin qadap aıtty.
Aıta keteıik, jyl aıaǵyna deıin 102 ótpeli jol qaıta jasalyp, jaryqtandyrýmen qamtamasyz etiledi. Avtobýs men trolleıbýs jolaqtary 100 kılometrge deıin uzarady. Aqyly kólik turaǵynyń sanyn 10 myń orynǵa jetkizý kózdelip otyr. Al, 1 700 velosıpedi bar velobeketter sany 200-ge deıin jetetin bolady.
Sonymen qatar, Fýrmanov, Abaı, Hmelnıtskıı kóshelerin uzartý jáne birneshe jolaıryqtaryn salý jumystary da jalǵasýda.
Jyl aıaǵyna deıin 500 aýlany jóndeý jáne qaıta jasaý josparlanǵan.
Bulardan ózge jaıaý júrginshige basymdyq berý úshin qaıta jańarǵan Panfılov, Jibek joly, Gogol, Qabanbaı batyr kósheleri men «Astana» alańyna kespe tas tóseý, jasyl jelek otyrǵyzý, kishi arhıtektýralyq formalardy ornatý, sport ınventarlaryn, balalar alańdaryn jasaý, velojoldardy abattandyrý, ǵımarattardyń syrtqy kórinisin jańartý jumystary josparlanǵan.
