Almaty ákimi qalanyń quqyq qorǵaý organdary basshylarymen keńes ótkizdi
ALMATY. Tamyzdyń 11-i. QazAqparat /Erbol Azanbek/ - Búgin Almaty qalasynyń ákimi Ahmetjan Esimov quqyq qorǵaý organdarynyń basshylarymen, olardyń qyzmetine arnalǵan arnaıy keńes ótkizdi.
Keńes barysynda qala ákimi zań organdarynyń úleskerlik qurylys nysandary boıynsha jumystaryna syn aıtty. Ahmetjan Esimovtyń aıtýynsha, sot ákimshiligi komıteti men UQQ-nyń bul baǵyttaǵy jumystary esh nátıje berip otyrǵan joq. Atap aıtqanda, úleskerlerdiń úmitin aqtamaı, óz aktıvterin jasyryp otyrǵan qurylys kompanııalarynyń nysandaryn tárkileý baǵytyndaǵy qos organnyń jumysy júzege aspaǵan.
Keńes barysynda qala ákimi quqyq qorǵaý organdary basshylarynyń atqaryp jatqan jumystary týraly tyńdap, birqatar tapsyrmalar berdi. Ol sondaı-aq otyrystyń Elbasy tapsyrmasyna sáıkes ótkizilip otyrǵanyn atap ótti. Esterińizge sala keteıik, tamyzdyń 4-i kúni Elbasy azamattardyń quqyǵyn qorǵaý máselesi boıynsha arnaıy keńes ótkizip, úleskerler, qylmyspen kúres, kásipkerlerdiń quqyǵyn qorǵaý máseleleri talqylanǵan edi. Sondaı-aq bul máseleniń aımaqtarda jeke talqylanýy týraly arnaıy tapsyrma bergen bolatyn.
