Almaty ákimi qalanyń aryq jelisin tekserdi
ALMATY. QazAqparat - Almaty ákimi Baýyrjan Baıbek jumys saparynyń aıasynda qalalyq aryq jelisiniń qurylysy men rekonstrýktsııalaný barysyn tekserdi, dep habarlaıdy QazAqparat tilshisi.
Jumys sapary aıasynda Almaty ákimine Alataý aýdanynyń Alǵabas shaǵyn aýdanynda sýaǵar jelisi men sý burý júıesin salý boıynsha atqarylǵan jumystar týraly aqparat berildi.
Aýdanda shamamen 7 shaqyrym bolatyn aryq jıekterin salý jumystary aıaqtaldy.
«Teploenergetıka» jáne «Energostroıtel» saıajaı massıvterinen ótetin Qarǵaly ózeniniń boıynda jóndeý jumystary jalǵasyp jatyr.
Ózen boıynyń 1300 metri temirbetonmen kúsheıtiledi. Ózen arnasyn mehanıkalyq tazalaý boıynsha jumystar aıaqtaldy.
Sondaı-aq, Almaty qalasynyń ákimi Naýryzbaı aýdanyndaǵy Nadyrov, Tájıev, Kúlbekov jáne Slanov kóshelerindegi 4 shaqyrymdyq aryq jelileriniń qurylysymen de tanysty. Onda joldardy asfalttaýǵa daıyndyq jumystary júrgizilýde.
Bostandyq aýdany Baǵanashyl shaǵyn aýdany jáne Medeý aýdanynyń Taır kóshesi boıynsha, Jetisý aýdanynyń «Malaıa almatınka» ózeni boıynan Volochaevskaıa kóshesi boıyndaǵy qorshaýdy kúsheıtý boıynsha qurylys jumystarynyń barysy tekserildi.
Bul ýchaskelerde gabıondy konstrýktsııalardan jasalǵan qorǵanys qabyrǵalary ornatylyp, jer asty jumystary júrip jatyr.
Jetisý aýdanyndaǵy bókter 345 metrge sozylyp jatyr. Quzdyń bıiktigi 7 metrge deıin jetedi. Qazirgi ýaqytta barlyq jóndeý jumystary aıaqtaldy.
Medeý aýdanynda kólbeý bókterlerdiń uzyndyǵy 470 metrge jetedi. Qazirgi tańda ýchaskede metalldy qorshaýlardy, beton bloktardy, aǵashtan istelgen sharýashylyq qora-jaılardy demontaj jasaý jumystary ótkizilýde.
Bul jumystar jospar boıynsha osy jyldyń qarasha aıynda aıaqtalmaq. Tek jer asty sýlarynyń paıda bolýynan jumystar uzaq ýaqytqa sozylyp ketýi múmkin ekendigi aıtylýda.
Qalanyń ınjenerlik-kommýnıkatsııalyq qurylymyn damytý máselesi «Almaty-2020» Damý baǵdarlamasynda jan-jaqty kózdelgen.
Atalǵan qujat 2015 jyly qoǵamdyq talqylaýdan ótti.
Qaladaǵy tótenshe jaǵdaıdy boldyrmaý maqsatynda
qala aýmaǵyndaǵy (onyń ishinde qosylǵan) sý qorǵaý jolaqtarynyń, ózenderdiń arnalarynyń, kanaldardyń, sýsharýashylyǵy qurylǵylarynyń jekelegen bólikterin qaıta jańǵyrtýdyń jobalyq-smetalyq qujattaryn ázirleý, qalanyń kishi ózenderiniń arnalarynyń jekelegen bólikterin qaıta jańǵyrtý, sý nysandarynyń sý qorǵaý jolaqtaryn qaıta jańǵyrtý jáne abattandyrý, kommýnaldyq menshiktegi sýsharýashylyǵy qondyrǵylarynyń qyzmetin qamtamasyz etý, aryq jelileri men nóser kárizderin qaıta jańǵyrtý jáne salý kózdelgen.
2020 jylǵa deıin Almatydaǵy barlyq aryqtar jańartylýy tıis.
Ótken jyly ákimdik qyzmetkerleri 1000 shaqyrym aryq jelisin teksergen edi. tekserý barysynda 500 km aryq jelisin aýystyrý kerektigin anyqtaldy.
Bıyl qalada 100 shaqyrym aryq jelisi jańartylsa, kelesi jyly qalǵan 400 shaqyrym aryq jelisi tolyq aýystyrylady.
Sonymen qatar, baǵdarlama boıynsha sýmen jabdyqtaý, sýdy aǵyzý júıesindegi shyǵyndar men tozýdy tómendetý, onyń ishinde jyl saıyn 30 shaqyrymǵa deıin qaıta jańǵyrtý esebinen kúrdeli, apatty jóndeýler kólemin arttyrý qarastyrylǵan.
2020 jylǵa qaraı jaqsy jáne qanaǵattandyrarlyq jaǵdaıdaǵy jergilikti avtomobıl joldarynyń sapasyn 80%-ǵa arttyrý kózdelgen. 2015 jyly bul kórsetkish 65% boldy.
2020-ǵa deıin ınjenerlik jelilerdiń tozý kórsetkishin tómendetý josparlanyp otyr.
