Almaty ákimi qalanyń ardager qurylysshylaryn marapattady
ALMATY. QazAqparat - Búgin Almaty ákimi Ahmetjan Esimov qala qurylysshylaryn tól merekesimen quttyqtady. Merekege oraı uıymdastyrylǵan saltanatty jıyn barysynda qala basshysy shahardaǵy sońǵy jyldary júzege asyp jatqan qurylys jumystarynyń qarqyny joǵary ekendigin atap ótti.
«Sońǵy jyldary ońtústik astanada áleýmettik, kommýnaldyq, kóliktik, turǵyn úı jańǵyrtý aıasynda birneshe nysandar salyndy. Onyń ishinde 22 mektep, 25 balabaqsha, 19 densaýlyq saqtaý nysany boı kóterdi. Mundaı qarqyndy qurylys qalamyzda birinshi ret bolyp otyr», - dedi ákim.
Sonymen qatar, qala basshysy bolashaqta atqarylar aýqymdy is týraly da aıtyp ótti.
«Bilim jyly aıasynda qalada 2760 orynǵa laıyqtalǵan 18 balabaqsha, 1200 oryndyq «Jas Qanat» mektebi salynyp jatyr. Sonymen qatar, 6 mektepke japsarjaı salynýda», - dedi ákim.
Qala ákimi qurylys salasynyń jetekshi mamandary men ardagerlerin tól merekesi qarsańynda arnaıy tósbelgimen marapattap, laıyqty qurmet kórsetti.
