Almaty ákimi qaladaǵy qurylys jumystarynyń sapasyn synǵa aldy
ALMATY. QazAqparat - Almaty ákimi Baýyrjan Baıbek qaladaǵy jaıaý júrginshilerge arnalǵan jol ınfraqurylymynyń sapasyn tekserip, jaýaptylardy sybap aldy, dep habarlaıdy QazAqparat tilshisi.
Ákim qaladaǵy birqatar dańǵyldar men kóshelerdi aralap, qurylys uıymdarynyń basshylaryna eskertý jasady. Abylaı han dańǵylyndaǵy jóndeý jumystaryna jaýapty «Elıtstroı» qurylys kompanııasynyń enshiles uıymynyń atqarǵan isterin synǵa aldy.
«Jumysty belgilengen merzimge deıin bitire almaǵandaryńyz azdaı, barlyq aýmaqty sapasyz jasaǵansyzdar. Trotýar men júretin jol túıispeıdi. «Almaty 2» vokzaly alańy 2 aıdan beri byǵyp jatyr. Jastar teatrynyń aldyn maýsym aıynda bastap edińizder, áli bitirmedińizder. Kompanııalaryńyzdyń bedelin ózderińiz túsiresizder. Qaıtadan jasap shyǵýǵa 2 aı ýaqyt beremin»,-dedi ol kompanııa dırektory Alekseı Balaganskııge.
Eger tapsyrma oryndalmasa atalǵan uıymdar nashar kompanııalar tizimine engizilmek.
Qala ákiminiń aıtýynsha, qurylys uıymdarynyń tirligi sógiske suranyp turatyn kórinedi. Jaıaý júrginshiler men kólikterdiń qozǵalysyna qarapaıym jaǵdaı jasalmaǵan.
«Bir jerdi qazar aldynda adamnyń qalaı ótetinin oılamaısyzdar. Qaı jermen júremiz. Myna jerde gaz júıelerin aýystyrypsyzdar, al trotýar astyndaǵy burynǵy qubyrlar áli joıylmaǵan»,-dedi ol Abylaı han-Kurmangazy aýmaǵyn nusqap.
Sondaı-aq ol gúlzardyń bordıýrdan joǵary ornatylǵanyn baıqap qaldy.
«Aryq aınalasyna orama gúlzar tósepsizder. Bularyńyz qazirden qoparylyp jatyr. Qar tazalaǵannan keıin ne bolady sonda? Barlyǵyn qaıtadan jasańyzdar. Baıqaımyn biraz aýmaqta gúlzar bordıýrdan bıik tur. Erteń búkil qoqys aryq pen trotýardy toltyrady»,-dedi ákim.
Qala Qurylys basqarmasynyń basshysy Nurbol Nursaǵatovtyń aıtýynsha, kóshe boıyndaǵy barlyq aqaýlar anyqtaldy. Jóndeý jumystaryna jaýapty kompanııalar kemshilikteriniń ornyn toltyrmasa aıyppul sanktsııalary qarastyrylatynyn aıtty.
«Jumystar áli qabyldap alynǵan joq. Barlyq qatelikterdi qalpyna keltirmeıinshe, jobany sapaly oryndamaıynsha aqshany tolyq tólemeımiz»,-dedi ol.
Buǵan deıin Baýyrjan Báıbek Respýblıka saraıy aldyndaǵy Abaı alańyndaǵy trotýar plıtasyn jasaýdaǵy shıkilikterdi túzetýdi tapsyrǵan bolatyn.
