Almaty ákimi qalada salynyp jatqan perınataldi ortalyqtyń qurylysy barysymen tanysty
ALMATY. 30 naýryz. QazAqparat /Názıra Eleýhan/ - Almaty ákimi Ahmetjan Esimov qalada salynyp jatqan perınataldi ortalyqtyń qurylysy barysymen jáne onyń sapasymen tanysty.
Ortalyq ústimizdegi jyldyń maýsym aıynda ashylady dep josparlanýda. Bul sońǵy eki jyl ishinde Almatyda paıdalanýǵa beriletin 8-shi medıtsınalyq mekeme bolmaq. Jyl aıaǵyna deıin taǵy da qosymsha 2 medıtsınalyq oryn paıdalanýǵa beriledi dep kútilýde.
Perınataldi ortalyq 150 oryndyq bolmaq. Ol júkti áıelder aýyr jaǵdaıda qalǵan kezde dereý kómek kórsetetin medıtsınalyq mekeme bolady. Ortalyqta júktilikten bastap, ishtegi náresteniń ósip- jetilýi, onyń ómirge kelýi túgeldeı derlik baqylaýǵa alynatyn bolady. Eger sábıdiń týǵannan júreginde múkis bolsa, onda ortalyqta birden arnaıy kardıohırýrgııalyq operatsııa, oftalmologııalyq lazerli korrektsııa, basqa da qajetti sharalar da osy jerde der kezinde jasalynady. Júkti áıelder tuńǵysh ret synaq negizindegi ÝZI-ge túsip, dıagnozdaryn durys qoıdyrýǵa múmkindik alady. Al, bul sóz joq, deni saý sábıdiń ómirge kelýine yqpal etpek.
Qazirgi kezde ortalyq qajetti qondyrǵylarmen jabdyqtalýda, qyzmetkerler biliktiligin jetildirýde, túrli normatıvti - quqyqtyq máseleler sheshimin tabýda.
Ortalyqtaǵy medıtsınalyq qyzmettiń deńgeıin arttyrý, zamanǵa saı sapaly medıtsınalyq kómek kórsetý maqsatynda sırek mamandyqtaǵy dárigerler men medbıkeler alys jáne jaqyn shetelderde bilimderin jetildirýde. Búginde balalar hırýrgtarynyń brıgadasy Reseıdiń Túmen men Novosıbır qalalaryndaǵy eń aldyńǵy qatarly balalardyń kardıologııalyq ortalyqtarynda arnaıy mamandanýdan ótken. Al, reanımatologtar, anestezıologtar Sankt-Peterbýrgte, Máskeýde, Bergamo men Berlınde bilimderin jetildirip qaıtty.
