Almaty ákimi halyq aldynda esep berip jatyr
ALMATY. QazAqparat- Almaty ákimi Baqytjan Saǵyntaev halyq aldynda esep berý kezdesýinde koronavırýs ınfektsııasynyń jappaı taralýyn boldyrmaýǵa ne kómekteskenin aıtyp berdi, dep habarlaıdy QazAqparat tilshisi.
Baqytjan Saǵyntaevtyń Almaty dıalogy 2.0 eseptik kezdesýi onlaın formatta ótip jatyr. Eń aldymen 2020 jyly qalada atqarylǵan jumystar týraly qysqasha fılm kórsetildi.
«Rasynda da árqaısymyz úshin ótken jyl shıelenisterdi baǵyndyrǵan jyl boldy.Álemdik pandemııa bizdiń ómirimizdi túbegeıli ózgertti. Mentalıtetimizge, ómir súrýimizge yqpal etti. Pandemııa áleýmettik jáne ekonomıkalyq salalarǵa keri áserin tıgizdi. Biraq bizdiń «Almaty birgemiz», degen sózde kórinis tapqan almatylyq yntymaǵymyz bizge pandemııany aýyzdyqtaýǵa kómektesti», - dep atap ótti qala ákimi Baqytjan Saǵyntaev.
Qala turǵyndarynyń arasynda ınfektsııanyń keń taralýyna jol bermeý maqsatynda Almaty ákimdigi áleýetsiz shyǵyndardan bas tartyp, bıýdjetti ońtaılandyrdy, COVID-19-ǵa qarsy kúreske 19 108,4 mlrd teńge bóldi. Osynyń arqasynda qysqa merzim ishinde 2 modýldi klınıka salyndy, RV-90 ınfektsııalyq statsıonardyń, patologoanatomııalyq bıýronyń qurylysy aıaqtaldy.
Klınıkalardyń materıaldyq tehnıkalyq bazasy 41,8 mlrd teńgege nyǵaıtyldy. Medıtsınalyq preparattar men dári-dármek tapshylyǵyn boldyrmaı, turaqtylyq qoryn qurý úshin qalalyq bıýdjetten 10 mlrd teńge bólindi.
Onyń 5 mlrd dárihanalardy qamtamamyz etýge, 5 mlrd aýrýhanalar men emhanalarǵa bólindi.
Jedel járdemniń jáne alǵashqy medıko-sanıtarlyq kómektiń jumystary kúsheıtildi. Kún saıyn 103 pýltine qalalyqtardan tórt myńǵa deıin qońyraýlar túsip otyrdy.
Qadamdyq medıtsınalyq qyzmetpen qamtamasyz etýdiń úsh jyldyq qalalyq josparynyń aıasynda 16 ambýlatorııa iske qosyldy.
Jedel járdem qyzmeti jańa reanımobıldermen qamtamasyz etildi. Zamanaýı qurylǵylarmen jabdyqtalǵan 135 jedel járdem kóligi satyp alyndy.
Sonymen qatar, qadrlar rezervi jasaqtaldy. Medıtsına qyzmetkerleriniń jalaqysy 30 %-ǵa kóterildi.
50 myńnan astam medıtsınalyq qyzmetkerlerge 16,7 mlrd kóleminde jalaqylaryna qosa ústeme aqy tólendi.
Qalalyqtarǵa qashyqtan keńes berý úshin Telemedıtsına ortalyǵy quryldy.
Daǵdarysqa qarsy tıimdi sharalardyń arqasynda ınfektsııanyń keń taraýyna, ólim-jitimge tosqaýyl qoıylyp, vaktsınalaýdyń bastalýyna deıin ýaqytty jeńýge múmkindik týdy.
Almatyda 2021jyldyń aqpanynda halyqty jappaı vaktsınalaýdyń aýqymdy naýqany bastaldy.
«Qala pandemııany laıyqty jeńip keledi. Búgingi kúni Almaty jasyl aımaqta. Bul biz qurǵan júıeler men qabyldaǵan sheshimlerdiń tıimdiligin kórsetedi», - dedi B. Saǵyntaev.
