Almaty ákimi halyq aldynda búldirshinniń tusaýyn kesti

ALMATY. QazAqparat - Almaty ákimi Erbolat Dosaev Alataý aýdanynyń turǵyndarymen kezdesý kezinde jas búldirshinniń tusaýyn kesti, dep habarlaıdy QazAqparat tilshisi.

Jıynda aýdan turǵyny Serik Qarmysbaev atty qarııa ákimnen shóberesiniń tusaýyn kesip berýin ótindi.

«Aınalaıyn Erbolat balam! Meniń bir shóberem bar edi. Sonyń tusaýyn kesip berińdershi osy jerde. Bir aıtaıyn degenim. Kóp rahmet», - dedi aqsaqal.

Erbolat Dosaev qarııanyń ótinishin oryndap, búldirshinniń tusaýyn kesti. Keıin aqsaqal qazaqy dástúrmen balaǵa batasyn berdi.

«Tusaýyń kesildi qulama,

Tizeńdi jaralap, jylama.

Qulyndaı quldyrańdap júgirshi,

Kánekı ózińdi syna da.

Sekirseń quzdan súrinbe,

Shyń quzǵa shyqqanda búgilme.

Bolattaı qabyrǵań qataısyń,

Ot, jalyn oınasyn túrinde.

Alla taǵalam Baýyrjannyń batyrlyǵyn bersin,

Abaıdyń aqyndyǵyn bersin,

Kúláshtiń ánshiligin bersin,

Tabanyń jerden taımasyn.

Ózińdeı sııaqty Erbolat,

Bir jerden shyǵatyn úlken azamat bolsyn!

Allahý akbar», - dep batasyn berdi qarııa.

Eske salaıyq, búgin Almaty ákimi Erbolat Dosaev qalanyń Alataý aýdanynyń turǵyndarymen kezdesti.

Onda qala ákimi Alataý aýdanynda bıyl jańadan 50 aıaldama salynatynyn, aýdandaǵy bes yqsham aýdannyń sýmen jabdyqtaý jáne káriz obektilerin «Almaty Sý» mekemesine berý úshin qajetti qujattar daıyndalyp jatqanyn, sondaı-aq, Alataý aýdanynda 7800 oryndyq 5 mekteptiń ashylatynyn málimdedi.