Almaty ákimi Erbolat Dosaev QR Prezıdentiniń atynan memlekettik nagradalardy tabys etti

ALMATY. QazAqparat - Erbolat Dosaev Qazaqstan Prezıdenti Qasym-Jomart Toqaevtyń atynan Almaty qalasynyń quqyq qorǵaý organdarynyń eńbek sińirgen ókilderin áskerı jáne qyzmettik boryshyn oryndaý kezinde kórsetken erligi men janqııarlyǵy, eldiń ulttyq qaýipsizdigi men qorǵanys qabiletin qamtamasyz etýge qosqan úlesi, sonymen qatar, zańdylyq pen quqyqtyq tártipti nyǵaıtqany úshin Qazaqstan Respýblıkasynyń memlekettik nagradalarymen marapattady, dep habarlaıdy QazAqparat tilshisi.

ІІ dárejeli «Aıbyn» ordenimen Aısbekov Sahı Qaıratuly, Almaty qalasy prokýrorynyń aǵa kómekshisi – Almaty qalasy prokýratýrasynyń ekstremızm men terrorızmge qarsy is-qımyl týraly zańnamanyń saqtalýyn qadaǵalaý tobynyń basshysy jáne Іshki ister mınıstrligi Almaty qalasy polıtsııa departamentiniń jergilikti polıtsııa qyzmeti basqarmasynyń bastyǵy Uzabaev Erjan Saǵynjanuly marapattaldy.

Sonymen qatar, «Jaýyngerlik erligi úshin» medalimen Qazaqstan Respýblıkasy Ulttyq qaýipsizdik komıtetiniń Almaty qalasy boıynsha departamenti bastyǵynyń orynbasary Murat Qydyráliuly Ospanov marapattaldy.

Búgin Memleket basshysy, Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev memlekettik nagradalar, joǵary áskerı jáne arnaýly ataqtar, synyptyq shender tapsyrý rásimine qatysty.