Almaty ákimi ekonomıka qurylymynyń ózgerisine beıimdelýdi usyndy
ALMATY. QazAqparat - Qalalyq máslıhat sessııasynyń otyrysynda Almaty ákimi Baýyrjan Baıbek ekonomıka qurylymyn júıeli ózgertýge basty baǵyt berý kerek ekenin aıtty, dep habarlaıdy QazAqparat tilshisi.
Sarapshylardyń taldaýlaryna sáıkes, IT-tehnologııa men elektrondy kommertsııa saýda men qarjy sektoryn yǵystyryp barady. Bul - Almaty ekonomıkasynyń 42%-y bolyp otyr.
Qala basshysy osy ózgeristerdi eskere otyryp, basymdyqty ıntellektýaldy sektor men týrızmge berýge shaqyrdy.
Memleket basshysynyń tapsyrmasy boıynsha «Almaty BAS JOSPAR» damý ınstıtýty quryldy. Bul ınstıtýt Sheberlik josparyn oryndaýmen aınalysatyn bolady.
«Qala budan bylaı jabaıy formatta damýdy toqtatady. Bolashaqta boı kóteretin qurylystardyń barlyǵy polıortalyq qaǵıdatymen salynady. Adamdar qajetti oryndaryna 20 mınýttyq qashyqtan qatynaı alady. Adamdarǵa emhana, HQO, oqý jáne jumys oryndary jaqyn ornalasatyn bolady. Qala basqarmalarynda tsıfrly tehnologııa keńinen qoldanylady. Qazirdiń ózinde Oqıǵa ortalyqtyń tuǵyrnamasy jasaldy. Oǵan 20 qalalyq júıe qosylady. Sonymen birge big data quryldy. Atalǵan júıe arqyly kólik jáne jaıaý júrginshi aǵynyna, qoǵamdyq kóliktiń, balabaqshalar men mektepterdiń, qala bıýdjetiniń júktemesine, qalany damytýdyń 1200-den astam ındıkatoryna monıtorıng júrgiziledi», - dedi qala basshysy.
Onyń aıtýynsha, 2019 jyldyń bekitilgen bıýdjetinde de áleýmettik baǵyt saqtalady.
Áleýmettik salaǵa bıýdjettiń 40%-y jumsalady. Mysaly, taǵy 8 mekteptiń seısmıkalyq qýaty kúsheıtiledi, úsh jańa mektep salynady. 38 jedel járdem karetasy, 800 medıtsınalyq qondyrǵy satyp alynady. Áleýmettik jaǵdaıy tómen jandarǵa kómek retinde 6 mlrd. teńge bólinedi, bul ótken jylmen salystyrǵanda 16%-ǵa kóp. Zeınetkerlerdi belsendi ómirge tartý 2 ese artady. «Sporttyq Almaty, «Sport meniń aýlamda» baǵdarlamalary odan ári jalǵasyp, oǵan 400 myń turǵyn jumyldyrylatyn bolady.
Óz kezeginde qoǵamdyq kólik pen ınfraqurylymdy damytý qala áleýetiniń basty baǵyttaryna aınalady. Qala basshysy sapaly qyzmet kórsetip, kólikterin jańalaǵan tasymaldaýshylar ǵana sýbsıdııa alatynyn aıtty.
Jalpy qalada 3 jyl ishinde 1100-den astam jańa avtobýs satyp alyndy. Metronyń eki beketiniń qurylysy júrip jatyr. Oǵan segiz jańa sostav satylyp alynady. Bul qozǵalys ıntervalyn tómendetip, kún saıynǵy jolaýshy aǵynyn 86 myń adamǵa deıin jetkizedi.
2019 jyly bes yqsham aýdanda 22,6 shaqyrym jol salynyp, 170 shaqyrym jol ortasha jóndeýden ótedi. Kishi kólik aınalymy aıasynda úsh jolaıryǵynyń qurylysy jalǵasady.
Qala keńistiginiń qolaılyǵyn qamtamasyz etý barysynda eki jyl ishinde tarıhı ortalyqtyń 60%-y jańardy. 2019 jyly «Qala adamdar úshin» prıntsıpi boıynsha jaıaý júrginshi aımaqtaryn abattandyrý josparlanyp otyr. Onyń ishinde Jibek Joly, Baıseıitova, Tóle bı kósheleri bar. 7 aýdannyń árqaısysynda keńeıtilgen trotýarlary bar bir kósheden jóndeletin bolady, olarǵa zamanaýı kóshe jıhazdary qoıylady, bes park pen skverge kúrdeli, toǵyz park pen skverge aǵymdaǵy jóndeý jumystary júrgiziledi.
Keler jyly aýlalarda aýqymdy jóndeý jumystary qolǵa alynady. Qazirgi kezde árbir úshinshi aýla jańarǵan, olardyń kópshiligi qalanyń shet aýdandarynda ornalasqan. Eger bıyl 575 aýla abattandyrylsa, 2019 jyly taǵy 600 aýla jańarady.
Memlekettik jekeshelik áriptestik aıasynda kóshe jaryqtary tolyq modernızatsııalanady. Qazirdiń ózinde jaryq kózderiniń 30%-y dıodty shamdarǵa aýystyrylǵan. Jańa kósheler ǵana emes, trotýarlar da jaryq bolýda. 2019 jyldan bastap dekoratıvti gúldi jáne vertıkaldy kógaldandyrý jobasy iske asyp, 12 myńnan astam aǵash pen butaq otyrǵyzylady.
Sel qaýpiniń aldyn alý úshin muz kólderdiń ahýalyn aldyn ala bilip otyrýǵa múmkin beretin monıtorıng stantsııasynyń tsıfrly júıesiniń alǵashqy kezegin engizý bastalady.
