Almaty ákimi ekologııalyq jáne azyq-túlik qaýipsizdigin arttyrý, máseleleri boıynsha qabyldanǵan sharalar týraly áńgimeledi
ASTANA. 27 naýryz. QazAqparat - Búgin Memleket basshysy Nursultan Nazarbaev Almatydaǵy rezıdentsııasynda ońtústik óńirlerdi damytý máseleleri jóninde keńes ótkizdi, dep habarlady QR Prezıdentiniń baspasóz qyzmeti.
Keńeske Prezıdent Ákimshiliginiń Basshysy K.Másimov, Premer-Mınıstrdiń birinshi orynbasary B.Saǵyntaev, Prezıdent Ákimshiligi Basshysynyń orynbasary Ǵ.Ábdirahymov, Almaty qalasynyń, Qyzylorda, Ońtústik Qazaqstan, Jambyl, Almaty oblystarynyń ákimderi qatysty.
Keńes barysynda Premer-Mınıstrdiń birinshi orynbasary B.Saǵyntaev Memleket basshysyna óńirlik damý máseleleri, ońtústik óńirlerde eleýli mańyzdy ónerkásiptik jáne ınfraqurylymdyq jobalardy iske asyrýjónindegi tapsyrmalardyń oryndalýy týraly baıandady. Ol Prezıdenttiń barlyq tapsyrmasy Úkimettiń turaqty baqylaýynda ekenin jáne júıeli dárejede júzege asyrylatynyn atap ótti.
Almaty qalasynyń ákimi Ahmetjan Esimov ekologııalyq jáne azyq-túlik qaýipsizdigin arttyrý, zańsyz kóshi-qondy retteý jáne qaladaǵy kólik problemalaryn odan ári jolǵa qoıý máseleleri boıynsha qabyldanǵan sharalar týraly áńgimeledi.
