Almaty ákimi Domınıkan Respýblıkasynyń syrtqy ister mınıstrimen kezdesti
ALMATY. QazAqparat - Almaty ákimi Baýyrjan Baıbek Domınıkan Respýblıkasynyń syrtqy ister mınıstri Mıgel Oktavıo Vargas Maldonadomen kezdesti, dep habarlaıdy QazAqparat.
Taraptar mádenıet, týrızm, ınvestıtsııa salalary boıynsha yntymaqtastyqty arttyrý máselelerin talqylady.
Kezdesý barysynda Domınıkan Respýblıkasy SІM basshysynyń Qazaqstanǵa alǵashqy sapary eki el arasyndaǵy ózara baılanysty damytýǵa yqpal etetini aıtyldy.
M.Vargas Astanadaǵy «EKSPO-2017» halyqaralyq kórmesiniń joǵary deńgeıde ótetinin, oǵan Domınıkan Respýblıkasynyń da qatysatynyn jetkizdi.
«Almaty qarjy ortalyǵy, jeke kapıtal jáne saýda qalasy retinde tanymal, bizdiń delegatsııa quramynda bankırler, óndirisshiler bar, naqty ınvestıtsııalyq jobalar týraly talqylaýǵa múmkindik jetkilikti», - dedi ol.
Domınıkan Respýblıkasy SІM-niń basshysy Almaty ákimin óz eline resmı saparmen kelýge shaqyrdy, bolashaqta Santo-Domıngo men Almatynyń baýyrlas qalalarǵa aınalatyndyǵyna jáne eki qala arasynda mádenı baılanystyń myqtap ornyǵatynyna senim bildirdi.
Domınıkan eliniń ókili «Smart sıtı» baǵdarlamasy aıasynda tájirıbe almasýǵa bolatyndyǵyn aıtty.
