Almaty ákimi búlik kezinde kóz jumǵan búldirshinniń otbasyna bardy

ALMATY. QazAqparat - Almaty ákimi Baqytjan Saǵyntaev qaladaǵy búlik kezinde 4 jasar qyz balasy qaıtys bolǵan kópbalaly otbasyǵa baryp, kóńil aıtty, dep habarlaıdy QazAqparat tilshisi.

Almatyda jappaı tártipsizdik beleń alǵan tusta 4 jasar Aıkórkem Meldehan qaıtys bolyp, onyń onyń 15 jasar ápkesi Janel jaraqat alǵan.
Búgin qala ákimi Baqytjan Saǵyntaev qaıǵydan qara jamylyp otyrǵan kópbalaly otbasyǵa bardy.
Qala ákimi qyzdyń ákesi Aıdos Meldihanuly jáne anasy Dınara Adamovaǵa orny tolmas qaıǵyǵa baılanysty kóńil aıtty.
Qaıtys bolǵan qyzdyń ápkesi Janel qazir jaraqatpen reanımatsııada jatyr.
Baqytjan Saǵyntaev Janeldiń saýyǵyp ketýin, ata-anasyna tózimdilik pen shydamdylyq tiledi.
Otbasyǵa materıaldyq kómek kórsetildi. Sonymen qatar, olarǵa 3 bólmeli páter beriletin boldy.

Aıta keteıik, qyzdyń ólimine baılanysty Qazaqstan Respýblıkasynyń Balalar quqyǵy jónindegi ýákili Arýjan Saın barlyq ata-analarǵa, almatylyqtarǵa barynsha saq bolý kerektigin eskertken bolatyn
Sondaı-aq, ol 5 qańtar kúni Almatyda oq jaraqatynan 11 jasar bala qaza tapqanyn jáne 7 qańtarda Almatydaǵy balalar aýrýhanalarynyń birine aýyr oq jaraqatymen 15 jastaǵy jasóspirim jetkizilgenin aıtqan bolatyn.