Almaty ákimi birqatar bilim berý nysandarynyń qurylysyn tezdetýdi tapsyrdy
ALMATY. QazAqparat - Almaty ákimdiginde ótken jıynda qala basshysy Ahmetjan Esimov birqatar bilim berý nysandarynyń qurylysyn tezdetýdi tapsyrdy. Bul týraly qalalyq ákimdiktiń baspasóz qyzmeti habarlady.
«Іlki joba aıasynda jyldyń sońyna deıin árbir aýdanda bir-bir balabaqshadan memlekettik-jeke seriktestik qaǵıdasy negizinde kontsessııaǵa nemese senimgerlik basqarýǵa berý qajet. «Baqaı» yqsham aýdanyndaǵy mekteptiń, jeti janama qurylys nysanynyń salynyp bitýin, 19 bilim berý nysandarynyń seısmıkalyq kúsheıtilýi men kúrdeli jóndeýden ótýin qadaǵalaýdy kúsheıtý kerek. 18 balabaqshanyń salynýyn, onyń ishinde 16-synyń 2014 jyly iske qosylýyn - erekshe baqylaýǵa alý qajet», - dedi Ahmetjan Esimov.
Ákim bıyl jarııalanǵan Bilim jyly aıasynda Almatyda osy salany qarjylandyrýǵa 2014 jyly bıýdjetten 71,4 mlrd. teńge qarastyrylǵanyn atap ótti. Bul 2013 jylmen salystyrǵanda 22%-ǵa joǵary.
Qala basshysynyń aıtýynsha, densaýlyq saqtaý salasynda da kóptegen máselelerdiń sheshimi kezek kúttirmeıdi.
Ahmetjan Esimov eki densaýlyq saqtaý uıymyn senimgerlik basqarýǵa kóshirýdi, emhanaǵa aınaldyrýǵa bolatyn ǵımarattardy satyp alýdy jáne de densaýlyq saqtaý qyzmetkerleri úshin jataqhana salýdy tezdetýdi tapsyrdy.
