Almaty ákimi Baýyrjan Baıbek: Tegin baspana bolmaıdy
ALMATY. QazAqparat - Búgin Almatyda qala ákimi Baýyrjan Baıbek halyqpen esepti kezdesý barysynda qala turǵyndarynyń baspana máselesi týraly aıtty, dep habarlaıdy QazAqparat tilshisi.
Qala basshysy burynǵydaı tegin baspana berý bolmaıtynyn jetkizdi.
«Tegin baspana bolmaıdy. Eger sizge páter kerek bolsa, kezekke turyńyz, tómen jalaqy alatynyńyzdy nemese múgedektigińizdi dáleldeıtin qujat kórsetińiz. Máslen, «Nurly jer» baǵdarlamasy arqyly 15 jylǵa paıyzsyz nesıemen byltyr 5 myń otbasy páter aldy, 175 jetimge páter berildi», - dedi Baýyrjan Baıbek.
Sonymen qatar, qala ákimi eski úıiniń qunyn buldap, memleketke qazirgi baǵammen berýge kelispeı otyrǵan úı ıelerin de tilge tıek etti.
«Bir eski úıde 12 otbasy tursa, onyń 11-i úıdi bosatýǵa kelisip tursa, 1 adam qarsy bolady. Men ol adamdarǵa aıtqym keledi. Burynǵy baǵa bolmaıdy. Úıdiń quny túsetin bolady. Osyndaı pikirdegi adamdardyń kesirinen túgel úıdiń súrilý protsesi toqtap turady. Kerisinshe, ákimdik eski úı turǵyndarynyń tezirek úı alýyn qamtamasyz etý úshin qaǵaz jumystaryn da barynsha azaıtyp, yńǵaıly jaǵdaı jasap otyr», - dedi qala ákimi.
Onyń aıtýynsha, Almatynyń Túrksib aýdanynda 400 otbasy karkas-qamystan soǵylǵan úıde turyp jatyr.
«Eski baspana» baǵdarlamasy boıynsha sońǵy 5 jylda 54 úı paıdalanýǵa berilgen. 500-den astam otbasy jańa úılerge kóshti.
