Almaty ákimi Baqytjan Saǵyntaev oqıǵa ornynda boldy
Bul týraly ákimniń baspasóz hatshysy Áset Muqajanov Instagram paraqshasynda jazdy.
«Bek Eır» áýe kompanııasyna tıesili «Fokker-100» ushaǵynyń qulaǵan jerine qala ákimi Baqytjan Saǵyntaev bardy. Qala basshysy izdestirý qutqarý jumystaryn baqylady. Odan shyǵyp Almaty áýejaıynyń termınalyn aralap shyqty. Sodan keıin №4 aýrýhana men Shuǵyl medıtsınalyq kómek kórsetý aýrýhanasyna, Balalarǵa shuǵyl medıtsınalyq kómek kórsetý ortalyǵyna baryp, zardap shekken adamdardyń halyn bildi. Qala basshysy qaza bolǵandardyń otbasyna qaıǵysyna otaqtasyp kóńil aıtty», - dedi Áset Muqajanov.
Aıta ketý kerek, búgin Almaty — Nur Sultan baǵytyndaǵy Bek Eır ushaǵy Almaty oblysy Álmerek aýylynda apatqa ushyrady.
Aldyn ala aqparat boıynsha bortta 93 jolaýshy, 5 ekıpaj múshesi bolǵan.
Qalalyq ákimdik taratqan aqparat boıynsha, kezekshi pýltine tańǵy 7:43-te qońyraý túsken. Oqıǵa ornyna Almaty oblysynyń Іle jáne Talǵar aýdanynan 16 jedel járdem brıgadasy shyqty. Almaty qalasynan 35 jedel járdem brıgadasy keldi. 2 neırohırýrgııalyq brıagada jolǵa shyqty.
Almaty oblystyq kóp profıldi aýrýhanasyna asa aýyr haldegi 5 patsıent jetkizildi.
Balalarǵa shuǵyl medıtsınalyq kómek kórsetý ortalyǵyna 8 bala jetkizildi. Olardyń barlyǵy túrli jaraqat alǵan. №4 qalalyq klınıkalyq aýrýhanaǵa 17 aadam asa aýyr jaraqatpen jetkizildi.
Qazir bul jumystarǵa psıhologtar da jumyldyryldy.
