Almaty ákimi aımaqtyń úzdik taýar óndirýshilerin marapattady
ALMATY. QazAqparat - Almaty ákimi Baýyrjan Baıbek aımaqtyq úzdik taýar óndirýshilerdi marapattady, dep habarlaıdy QazAqparat tilshisi.
Endi 9 kompanııa aımaqtyń namysyn respýblıkalyq baıqaýda qorǵaıtyn bolady.
Aıta ketý kerek, barlyǵy baıqaýǵa 62 kompanııa qatysty. «Óndiristik baǵyttaǵy úzdik taýar» atalymy boıynsha «SOLO LTD» JShS jeńimpaz atandy.
«Bizdiń eńbegimizdi joǵary baǵalaǵanyna óte qýanyshtymyn. Mundaı senim kásipkerdi erekshe yntalandyrady. Bizdiń kásiporynǵa 26 jyl boldy. Osy ýaqytqa deıin radıatsııalyq baqylaý salasynda kóptegen qurylǵy jasadyq. Respýblıkalyq baıqaýdan júlde alýǵa úmittimiz», - dedi tehnıkalyq dırektor Vladımır Abılentsev.
«Eń úzdik azyq-túlik taýary» atalymyn «Bıjan» et óńdeý zaýyty jeńip aldy.
«Osymen úshinshi ret qatysyp otyrmyz. Biraq birinshi ret jeńimpaz boldyq. Satyp alýshylarǵa bizdiń ónim unaıdy. Respýblıkalyq baıqaýda da kópshiliktiń kóńilinen shyǵamyz degen oıdamyz», - dedi kompanııanyń bas dırektory Hadısha Nurtaıqyzy.
«Eń úzdik halyqqa arnalǵan taýar» atalymy boıynsha «Angelcher» JShS birinshi orynǵa turaqtady.
«Bizdiń eńbegimizdi baǵalap elep-eskergenderińizge rahmet. Bizdiń bıznesimizge aýdandyq ákimshilik te kásipkerler palatasy da kómegin aıamaıdy. Bizdiń ónimimiz kópshilikke unaıdy», - dedi.
«Angelcher» kompanııasynyń basshysy Elena Vaılıýlına. Atalǵan kórme-baıqaýda úshinshi orynǵa «Tea House», «ProfiModa» «IDC» JShS laıyq dep tanyldy.
Ekinshi orynnyń sertıfıkatyn «Tsın-Kaz» JShS, «Jetisý» AQ jáne «Smart Pay» JShS ıelendi.
Aıta ketý kerek, baıqaýdyń fınaldyq kezeńi Astanada ótedi. Jeńimpaz kompanııalardy Memleket basshysy marapattaıtyn bolady.
