Almaty ákimi ArtSport baǵdarlamasy nege toqtap qalǵanyn túsindirdi

ALMATY. QazAqparat - Almaty ákimi Erbolat Dosaev ArtSport baǵdarlamasy qarjy máselesine baılanysty ýaqytsha toqtatylǵanyn aıtty, dep habarlaıdy QazAqparat tilshisi.

Almaty ákimniń Jetisý aýdany turǵyndarymen kezdesýi barysynda ArtSport ókili Qýat Erǵalıev baǵdarlamany qarjylandyrýdy toqtatý týraly hatty qaıtaryp alýdy, máslıhattyń kezekten tys sessııasyn ótkizýdi, bıýdjetke ózgerister engizýdi jáne jańa joldamalar alýǵa ruqsat berýdi surady.

«Biz qarjy máselesine baılanysty baǵdarlamany ýaqytsha toqtattyq. Eń bastysy kredıtorlyq qaryzdy jabý kerek. Ata-analardyń ótinishi boıynsha jumys tobyn qurdyq. Alǵashqy kezdesýler ótti. Baǵdarlama boıynsha qaryzdy jabý úshin qarajat izdeımiz dep kelistik, bul shamamen 2,2 mıllıard teńge. ArtSport baǵdarlamasyna sáıkes, aldyn ala tekserýler júıede qujatta bar, ómirde joq adamdar bar ekenin kórsetti. Biz platforma ázirleýshilerdi shaqyrdyq. Júıeniń álsiz jaqtaryn joıý qajet. Qazir jergilikti baǵdarlama boıynsha jumys istep jatyrmyz», - dep jaýap berdi qala ákimi.

Buǵan deıin Erbolat Dosaev 1 qyrkúıekten bastap Artsport baǵdarlamasyn qarjylandyrý toqtatylatyny týraly aıtqan bolatyn.

Sondaı-aq ol qazirgi tańda halyqtyń áleýmettik osal toptary sanatyndaǵy balalarǵa arnalǵan sport sektsııalarynyń qalalyq baǵdarlamasyn ázirleý múmkindigi qarastyrylyp jatqanyn jetkizdi.