Almaty ákimi ardagerlerge kómek kórsetýdi tapsyrdy

ALMATY. QazAqparat - Almaty ákimi Baqytjan Saǵyntaev azamattardy qabyldady, dep habarlaıdy QazAqparat tilshisi.

Onlaın formatta ótken qabyldaý kezinde qala turǵyndary turǵyn úı qatynastaryna, mádenıet salasyn qoldaýǵa jáne kommýnaldyq sektordy damytýǵa qatysty suraqtar qoıdy.

Qabyldaýǵa qatysqandar arasynda jekeshelendirý quqyǵynsyz memleket bólgen jaldamaly páterde turatyn soǵys ardageri Gennadıı Vasılevıch Novolenov ta boldy.

Onyń ótinishi boıynsha qala ákimi Baqytjan Saǵyntaev turǵyn úı saıasaty basqarmasyna kommýnaldyq qordan jekeshelendirý quqyǵy bar balamaly páter tabýdy tapsyrdy.

Galına Bıgeldınovanyń ótinishi boıynsha T. Bıgeldınov atyndaǵy halyqaralyq qaıyrymdylyq qoryna qoldaý kórsetý múmkindigi qarastyryldy.

Ý. Muhametqalıdiń jobasy – Dalagram qosymshasyn iske asyrý úshin venchýrlik qor tarapynan kómek kórsetýdiń joldary izdestiriledi.

«Sazgen sazy» folklorlyq-etnografııalyq ansambliniń kórkemdik jetekshisi B. Tilegenov bıyl 40 jasqa tolatyn ujymnyń shyǵarmashylyǵy, damý kezeńderi men shyǵarmashylyq jobalary týraly aıtty.

Almaty ákimniń tapsyrmasy boıynsha qalanyń mádenıet basqarmasy ansambldiń materıaldyq-tehnıkalyq bazasyn, mýzykalyq aspaptary men kostıýmderin jańartý josparyn ázirleıtin boldy.

Energotıimdilik jáne ınfraqurylymdyq damý basqarmasyna V.Slavıkovskııdiń jylý jelileriniń energııa tıimdiligin arttyrý jónindegi usynystaryn qaraý tapsyryldy.

Sonymen qatar, jasyl ekonomıka basqarmasy Baqytjan Saǵyntaevtyń tapsyrmasy boıynsha «Atakent» kórme ortalyǵynyń aýmaǵyn keshendi abattandyrý, kógaldandyrý jáne jóndeý boıynsha jospar daıyndaıdy.

Ortalyq dırektory M. Maqypova kórme sharalaryn ótkizýge ruqsat berýdi ótindi.

Almaty qalasynyń bas memlekettik sanıtarlyq dárigeriniń qoldanystaǵy qaýlysyna sáıkes «Ashyq» jobasy aıasynda kórme uıymdaryna jumys jasaýǵa ruqsat berilgen.

Tek sanıtarlyq-epıdemıologııalyq qaýipsizdik talaptaryn saqtaı otyryp, «Atakent» qajetti sharalardy ótkize alady.