Almaty ákimi arbamen júretin múgedegi bar 20 otbasyǵa páterlerdi jaldaý sharttaryn tapsyrdy
ALMATY. Tamyzdyń 13-i. QazAqparat /Ádilet Musahaev/ - Búgin Almaty qalasynyń ákimi Ahmetjan Esimov arbamen júretin múgedekteri bar otbasylar úshin salynǵan turǵyn úıden qaladaǵy 20 otbasyǵa páterlerdi jaldaý shartyn tapsyrdy.
Qala ákimi jurtshylyqty búgingi qýanyshty kúnderimen quttyqtaı kele bul arnaıy joba boıynsha salynǵan qalamyzdaǵy birinshi úı ekendigin jetkizdi. «Byltyr mamyr aıynda qurylysy bastalǵan nysan búgin aıaqtalyp, kezekte turǵan múgedegi bar otbasylarǵa jalǵa berilip otyr. Oǵan qala bıýdjetinen 227 mıllıon AQSh dollary bólindi. Bul úıdiń pantýsynan bastap, lıftisi, bólmeler ishiniń barlyǵy múgedek jandarǵa qolaıly etip jasalǵan. Osyndaı áleýmettik máselelerge Elbasynyń tapsyrmasy boıynsha kóp mán berip kelemiz jáne keleshekte de osyndaı úılerdi salýdy josparlap otyrmyz», dep atap ótti óz sózinde A.Esimov.
Páterler aýdan ákimdikterinde 1988 jyldan beri kezekte turǵan, halyqtyń áleýmettik jaǵynan qorǵalatyn toptaryna jatatyn jandarǵa berildi. Qala boıynsha mundaı toptarǵa jatatyndardyń sany 7 myńnan asady eken.
Kezekte 15 jyl turyp, búgin 1 bólmeli páterge qol jetkizgen Qarlyǵash Maımaqova óz qýanyshyn jasyrmady. «Bul páter biz úshin úlken syılyq bolyp otyr. Óıtkeni munda múgedek jandar úshin barlyq jaǵdaı jasalǵan. Páterlerdiń esikteri keń, arbamen júretin balamdy dalaǵa shyǵaryp turýǵa óte qolaıly» deıdi Q.Maımaqova.
