Almaty ákimi apattan zardap shekkenderge barlyq qajetti medkómek kórsetýdi tapsyrdy
ALMATY. QazAqparat - Baqytjan Saǵyntaev ushaq apatynan zardap shekkenderge barlyq qajetti medıtsınalyq kómek kórsetýdi tapsyrdy, dep habarlaıdy QazAqparat tilshisi.
Almaty ákimi Baqytjan Saǵyntaev qalanyń áýejaıynda bolǵan AN-26 ushaǵy qulaǵan jerge bardy.
Qala basshysy Twitter akkaýntynda jaǵdaıdy baqylaýda ustap otyrǵanyn habarlady.
«AN-26 áskerı ushaǵy qulaǵan jerge bardym. Tıisti qyzmet ókilderine bolǵan oqıǵanyń saldaryn joıýdy tapsyrdym. Qaza bolǵandardyń týystary men jaqyndaryna kóńil aıtamyn. Zardap shekkenderge barlyq qajetti medıtsınalyq kómek kórsetilýde», - dep jazdy B. Saǵyntaev.
Eske salsaq, búgin Nur-Sultan-Almaty baǵytynda kele jatqan AN-26 áskerı ushaǵy 17.22-de radardan joǵalyp, qala áýejaıy mańynda apatqa ushyrady.
Ushaqta bolǵan 4 adam qaza tapty. 2 adam túrli jaraqattarmen Almaty qalasynyń 4-qalalyq klınıkalyq aýrýhanasyna jetkizildi.
