Almaty ákimi Alǵabas turǵyndarynyń shaǵymyna jaýap berdi

ALMATY. QazAqparat - Almaty ákimi Baqytjan Saǵyntaev onlaın brıfıng barysynda Alǵabas joldaryna qatysty pikir bildirdi. Buǵan deıin turǵyndar joldardyń balshyqqa batyp jatqanyn aıtyp, shaǵymdanǵan edi, dep habarlaıdy QazAqparat tilshisi.

Brıfıng barysynda jýrnalıster ákimnen Alǵabas shaǵynaýdany turǵyndaryna jedel járdem qalaı jetetinin surady.

Buǵan deıin atalǵan aýdan turǵyndary qazylǵan jer men ilinip turǵan elektr symdaryna shaǵymdanǵan bolatyn.

«Alǵabastaǵy jaǵdaı bir kúnde sheshilmeıdi. Bul aýmaqtar oblystan qosylǵanyn bilesizder. Sym, ıá, ashyq ilinip tur. Bul aýyldar salynǵan kezde turǵyndar symdy ózderi tartqan. Olardy retke keltirý úshin keshendi jumys júrgizý kerek, ony istep jatyrmyz. Barlyq Alǵabasty elektrlendirý úshin JSQ jasaý kerek, aqsha bólý kerek. Ol symdy tarta salý nemese «ızolentamen» oraý emes qoı. Bul - úlken ınjenerlik jumys. Barlyq Alǵabas bir kúnde retke kelmeıdi», - dedi ákim.

Sonymen qatar, ákim qazylǵan joldarǵa da túsinik berdi.

«Joldarǵa keletin bolsaq, birinshi kezekte adamdar ortalyqtandyrylǵan káriz júıesin, sýmen jabdyqtaýdy suraıdy, biraq ony júrgizý úshin qazý keregin túsinesiz ǵoı. Mysaly, bizde qalanyń 23 shaǵynaýdany múlde eshteńemen qamtamasyz etilmegen. Men Alǵabas turǵyndaryna birneshe ret baryp, túsindirdim. Asfalt tóseımiz. Jalpy bizde 2023 jylǵa deıingi barlyq shaǵynaýdandy sýmen jáne kárizben qamtamasyz etý mindeti tur. Oǵan trıllıon teńgege jýyq qarajat bólindi. Bul - az soma emes jáne kúrdeli jumys», - dedi Baqytjan Saǵyntaev.