Almaty ákimi áleýmettik nysandardyń qurylysyn tekserdi
ALMATY. QazAqparat - Almaty ákimi Baqytjan Saǵyntaev ınjenerlik jáne áleýmettik ınfraqurylym salynyp jatqan birqatar yqshamaýdanda boldy, dep habarlaıdy QazAqparat tilshisi.
Megapolıs ákimi Instagram-daǵy paraqshasynda ınjenerlik qurylymdy jańartý men nyǵaıtýdyń mańyzdy ekenin atap ótti.
«Muztaý» yqshamaýdanynda taratý jelileri salynyp jatyr. Bıyl úılerdi sýmen jabdyqtaý jáne sý burý júıesine qosýǵa kirisemiz. Órt sóndirý deposy men biryńǵaı kezekshi-dıspetcherlik qyzmettiń qurylys alańdarynda boldym», — dep jazdy B. Saǵyntaev.
Almaty ákimi qaıta jóndeýden ótken jáne qosymsha oryndary bar №54 mektepte de boldy. Qala turǵyndary jumyspen qamtý, turǵyn úı jáne taǵy basqa saladaǵy 50 túrli máselelerge qatysty «bir tereze» qaǵıdaty boıynsha keńes ala alatyn Áleýmettik qyzmet kórsetý úıiniń jumysy aıaqtalýǵa jaqyn.
Sonymen qatar, Alataý aýdanynda 14 kortqa arnalǵan jańa tennıs ortalyǵy men jabyq shaǵyn fýtbol alańy, ústel tennısi bar ortalyǵynyń, sondaı-aq Alǵabastaǵy 12 myń adamǵa arnalǵan meshittiń qurylysy jalǵasýda. Ortalyq mádenıet jáne demalys saıabaǵyndaǵy velotrekti jóndeýden ótkizý týraly sheshim qabyldandy.
Almaty ákimi Baqytjan Saǵyntaev qurylys sapasyn baqylaýdy kúsheıtýdi, kóshe keńistigin jaqsartý boıynsha jumystar júrgizýdi tapsyrdy. Tóle bı kóshesindegi joldardyń jóndelýi - erekshe baqylaýda.
