Almaty ákimi Ahmetjan Esimov qala aýmaǵyna jańadan qosylǵan jerlerge qatysty keńes ótkizdi
ALMATY. 4 maýsym. QazAqparat /Názıra Eleýhan/ - Almaty qalasynyń ákimi Ahmetjan Esimov Úlken Almaty ózeni ańǵaryndaǵy qalaǵa jańadan qosylǵan aýmaqty abattandyrýǵa qatysty kóshpeli keńes ótkizdi. Buryn bul jer Almaty oblysynyń Qarasaı aýdanynyń quzyrynda bolatyn, endi Almaty qalasynyń Bostandyq aýdanynyń qaramaǵyna ótetin bolady.
Jalpy kólemi 1330,25 gektar jerdi quraıtyn jańa aýmaq Almatynyń odan ári tolyqqandy damýy men áleýmettik ınfraqurylymyn jaqsartý maqsatynda qosylǵaly otyr.
Jumys sapary barysynda qala ákimi eń aldymen ekologııalyq beketterdi retke keltirýdi, qalaǵa qosylǵan aýmaqtaǵy barlyq qurylystardyń zańdylyǵyn anyqtaý úshin olardy ınventarızatsııadan ótkizýdi, sonymen qatar, salynyp jatqan ár nysandy tekserýdi tapsyrdy.
Sondaı-aq, Ahmetjan Esimov sýy qorǵalatyn aımaqqa erekshe nazar aýdardy. "Úlken Almaty ózeni strategııalyq qalalyq nysan bolyp tabylady, ol Almaty qalasyn sýmen qamtamasyz etetin, saǵatyna 223 000 tekshe metr aýyz sý beretin (tutynýdyń 47%-y) negizgi sý kózi. Nysan teńiz deńgeıinen 2 511 metr bıiktikke, Ál- Farabı - Navoı aınalymynan 28,5 km. jerde ornalasqan. Úlken Almaty ózeniniń ańǵarynda jalpy qýaty 1,5 MVt bolatyn kishi GES-tiń kaskady, selden qorǵaıtyn qurylymdar bar. Sonymen qatar, ózenniń bir bóliginen elektrdi jáne sýdy jınaqtaıtyn kommýnıkatsııalyq korıdor da ótedi. Barlyq obektiler Almatyǵa jumys isteıdi. Atalǵan obektilerdi durys paıdalaný ári salynyp jatqan qurylystardy retke keltirý úshin Úlken Almaty ózeni ańǵarynyń mańaıyndaǵy jalpy aýmaǵy 707,66 gektar jerdi qalanyń tıisti mekemeleri baqylaýǵa alýy tıis",-dedi qala basshysy.
Almaty oblysynyń Qarasaı, Talǵar, Іle aýdandary jerleriniń bir bólikteriniń qalaǵa qosylǵandyǵy jónindegi «Almaty qalasynyń shekarasyn ózgertý týraly» Jarlyqqa QR-nyń Prezıdenti bıylǵy jyldyń 12 mamyrynda qol qoıǵan bolatyn.
