Almaty ákimi Ahmetjan Esimov 7-Qysqy Azııa oıyndaryn ótkizý jónindegi qalalyq dırektsııanyń shtabynda boldy
ALMATY. 17 qańtar. QazAqparat /Ádilet Musahaev/ - Búgin Almaty qalasynyń ákimi Ahmetjan Esimov 7-Qysqy Azııa oıyndaryn ótkizý jónindegi qalalyq dırektsııanyń shtabynda bolyp, eriktiler qyzmetiniń daıyndyǵymen, baspasóz ortalyǵy jáne shtabtyń jalpy uıymdastyrý jumysymen tanysty.
A.Esimovke eriktilerdiń tıisti jumys barysynda kıetin kıim úlgileri men kádesyı ónimderi kórsetildi. Qazirgi tańda qysqy Azııa oıyndaryn ótkizýge Almaty boıynsha 2400 erikti tańdalǵan. Olar qonaqtar men Azıadaǵa qatysýshylar bolatyn barlyq alty sport nysany men áýejaıda, temirjol vokzaly jáne qonaqúılerde jumys isteıtin bolady.
Sondaı-aq eriktiler qoǵamdyq tamaqtaný, medıtsınalyq qyzmet kórsetý, dopıngke qarsy tekseris, sporttyq sharalar, sportshylarǵa jol nusqaý sııaqty 13 baǵyt boıynsha jumys isteıdi. Barlyq eriktilerge qajetti jaraqtar, tegin tamaq pen qaýipsizdikteri qamtylǵan. Jaqyn kúnderi eriktilerge arnalǵan sharalar ótedi.
Qala ákimi Azıada kezinde baspasóz ortalyǵy pen shtabtyń úılestirý jumystaryn jiti baqylaýdy tapsyrdy.
