Almaty ákimi A.Esimov QMEBI-diń jańadan ashylǵan sport kesheninde boldy
ATY. 12 qarasha. QazAqparat /Ádilet Musahaev/ - Búgin Almaty qalasynyń ákimi Ahmetjan Esimov Qazaqstannyń Menedjment, ekonomıka jáne boljaý ınstıtýtynda bolyp, onda jańadan ashylǵan sport keshenimen tanysty.
Qala ákimi QMEBI stýdentteri men oqytýshy qaýymyn búgingi jańadan ashylǵan sport nysanymen quttyqtap, izgi nıetin bildirdi.
"Prezıdentten bastap barlyǵymyz eldegi sporttyń damýyna asa nazar aýdarýdamyz. Sport - bul densaýlyq, memleket jetistigi. Qazir VII Qysqy Azııa oıyndaryn ótkizýge daıyndalýdamyz. Sondyqtan kóptegen sport keshenderine jóndeý jumystaryn júrgizip, jańa nysandardy da salyp, halyqaralyq sarapshylardyń joǵary baǵasyna ıe boldyq", - dedi qala ákimi.
Sondaı-aq ol sońǵy jyldary qalamyzda ashyq jáne jabyq sport keshenderi ashylyp jatqandyǵyn jetkizdi. Buǵan bir jaǵynan el bıýdjetinen qarjy bólinse, ekinshi jaǵynan jeke ınvestorlar tartylýda eken.
A.Esimov qala ákimdigi QMEBI-di árqashanda qoldaıtyndyǵyn jáne bul kezinde Elbasynyń bastamasymen ashylǵan biregeı oqý ordasy ekendigin jetkizdi.
Qazir munda 3800-den asa stýdent bilim alýda. 300-ge jýyq adam jumys isteýde, onyń 76-sy sheteldik maman.
"Bul oqý ordasynyń qabyrǵasynda 4 myńnan astam adam bar, bul úlken ujym bolyp esepteledi. Sodyqtan ol únemi qala ákimdiginiń nazarynda bolady. QMEBI-diń túlekteri elimizdiń túrli salasynda qyzmet etip, jemisti nátıje kórsetip júr. Biz QMEBI-diń stýdentteri men olardy sapaly bilim alsyn dep jiberip otyrǵan ata-analarynyń úmitin odan ári aqtaýyna tilektespiz", - dep atap ótti óz sózinde A.Esimov. Degenmen stýdentterdiń tek myqtylar qatarynan kóriniý úshin talpynýlary kerektigin de jasyrmady. "Qazir Prezıdenttiń ózi bul oqý ordasyn qoldaýda, sondyqtan bedeldi bilim ornyna laıyqty bolýlaryń kerek", - dedi qala ákimi.
