Almaty ákimi 70 myń páterge jylý beretin qazandyqtyń jumysyn tekserdi

Almaty ákimi Baýyrjan Baıbek jergilikti bıýdjet esebinen qaıta jańarǵan «Almaty jylýkommýnenergo» JShS-ne qarasty Ońtústik-Shyǵys qazandyǵyn qarap shyqty. Jańǵyrtý jumystarynan keıin qazandyqtyń jylý qýaty 25%-ǵa artqan.

Qalalyq ákimdik endi megapolıstegi myńdaǵan páterge jylý turaqty berilip qana qoımaı, jańa abonentterdiń qosylýyna da múmkindik týǵanyn jetkizdi.

«Ońtústik-Shyǵys qazandyǵyn kúrdeli jóndeýden ótkizý gıdravlıkalyq shyǵyndy azaıtty, kásiporyn qýatyn 168-den 208 Gkal/saǵatqa kóbeıtip, tutynýshyǵa jylý berý sapasyn arttyrdy. Sonyń arqasynda 40 kóppáterli turǵyn úı jylý jelisine qosyldy. 1979 jyly iske qosylǵan qazandyqqa bıyl alǵash ret aýqymdy qaıta qurý jumysy jasalyp otyr. Jańǵyrtý jumystary bir jyl boıy júrgizilip, oǵan 3 mlrd teńge bólindi. Qazandyqtyń sýytatyn qubyry, baqylaý-ólsheý qondyrǵylary, avtomatıka, sýdy hımııalyq tazalaý jabdyqtary túgel jańardy. Jıilikti retteıtin energosyıymdy jeli nasostaryn aýystyrý arqyly elektr energııasyn únemdeıtin boldyq», - dedi qala ákimine qarata aıtqan sózinde qalalyq Energetıka basqarmasynyń basshysy Ermek Úsenbaev.

Búgingi kúni Ońtústik-Shyǵys qazandyǵy 70 myńnan astam páterge, 700 zańdy tulǵaǵa qyzmet kórsetedi. Qala jylýynyń 9%-ǵa jýyǵyn beretin qazandyq gazben jumys isteıdi. 

Aıta keteıik, Almaty qalasynda bıylǵy jaz maýsymynda ınjenerlik jelilerdi qaıta jasaý men salý barysynda aýqymdy jumystar júrgizilgen bolatyn. Nátıjesinde, jalpy uzyndyǵy 761,3 shaqyrym ınjenerlik júıe jańardy. Onyń ishinde, 313 shaqyrym sý, 266 shaqyrym káriz qubyrlary men 150 shaqyrym elektr jáne 32,3 shaqyrym jylý jelileri qaıta jasaldy.

Qalalyq ákimdiktiń málimetine súıensek, sýmen qamtamasyz etý jelilerin modernızatsııalaýdan keıin qubyrlardyń tozýy 3%-ǵa, apat 4%-ǵa, shyǵyn 5,2%-ǵa azaıǵan. Qalanyń 11 myńnan astam turǵyny sýmen qamtýdyń ortalyqtandyrylǵan júıesine qosylǵan.

Foto almaty.gov.kz