Almaty ákimi 20 sáýirden bastap qandaı nysandar jumys isteıtinin aıtty
ALMATY. QazAqparat - Almaty qalasynyń ákimi Baqytjan Saǵyntaev 20 sáýirden bastap qalada qandaı nysandar ashylatyndyǵy jáne qaýipsizdik sharalary saqtalmaǵan jaǵdaıda olardyń qalaı jazalanatyny týraly aıtty, dep habarlaıdy QazAqparat tilshisi.
«Keshe, memlekettik komıssııanyń otyrysynda Almatydaǵy óndiristik nysandardyń 20 sáýirden bastap jumys isteýge daıyn ekenin jetkizdik. Osy ýaqytqa deıin ındýstrıaldy aımaq toqtaýsyz jumys istedi, búgingi kúnge deıin qurylys materıaldaryn shyǵaratyn zaýyt,tamaq, jeńil ónerkásiptiń bir bóligi jumys istep turdy. Endi qalǵan bóligine kelesi aptadan bastap jumys isteýge ruqsat berildi»,– deıdi Baqytjan Saǵyntaev.
Onyń aıtýynsha, qurylysshylardyń ótinishine baılanysty kóterme bazarlar jumysy qalpyna keltiriledi. Megopolıste olardyń sany beseý.
«Sonymen qatar, « Atameken «UKP ótinishi boıynsha notarıýstar men birneshe halyqqa qyzmet kórsetý ortalyqtarynyń belgili bir bóligi jumys isteıdi. Bul qajet, óıtkeni qazir memleket tarapynan kórsetilip jatqan kómekter ekinshi deńgeıli bankter arqyly júzege asyrylýda. Al, ol jaqqa birneshe qujat qajet», - dep tolyqtyrdy qala ákimi.
Sonymen qatar, ol 20 sáýirden bastap jumys isteıtin kásiporyndardyń sanıtarlyq talaptardy buljytpaı oryndaý kerektigin basa aıtty.
«Daıyndyq jumystaryn barlyq kásiporyn basshylary júrgizýi kerek. Qashyqtyq, sanıtaızer, maska, qolǵap, jeke saqtaný quraldarymen qamtamasyz etilýi tıis. Dúısenbiden bastap aýdıt júrgiziledi. Eger daıyn bolmasa, ol qyzyl karta alady jáne kemshilikterin joımaıynsha ashylmaıdy. Aldaǵy ýaqyta da únemi tekserip otyramyz, kemshilikter qaıtalanatyn bolsa nysan jabylyp, qaıta ashylmaıdy. Biz osyndaı jazany qoldanamyz», - dedi ákim.
