Almaty ákimdiginiń ǵımaratynda taǵy da órt boldy - TJM
ASTANA. Qańtardyń 14-i. QazAqparat - Almaty qalasy ákimdiginiń ǵımaratynda taǵy da órt shyqty,
dep habarlaıdy QR TJM.
Vedomstvo baspasóz qyzmetiniń málimetine sáıkes, qańtardyń 13-i kúni saǵat 10.32-de Bostandyq aýdanyndaǵy Respýblıka alańy, 4-shi úıde ornalasqan ákimdiktiń tehnıkalyq qabatynda №1-shi jeldetkish kamerasyndaǵy jylytqyshtyń janýy boldy. Jalyn 10 sharshy metr aýmaqqa taraǵan. «Qurban bolǵandar men zardap shekkender joq. Ǵımarattan 60 adam qaýipsiz jerge kóshirildi», - dep atap ótti olar.
Tilsiz jaý Almaty qalasy boıynsha TJD órtke qarsy qyzmetiniń 41 adamy men 17 tehnıkasynyń kúshimen saǵat 11.41-de aýyzdyqtaldy.
Esterińizge sala keteıik, bul - ótken táýlikte Almaty ákimdiginde oryn alǵan ekinshi órt. Qańtardyń 12-sinen 13-ine qaraǵan túni saǵat 01.14-te mekemeniń 6-shy qabatynda 30 sharshy metr aýmaqta baspasóz qyzmetiniń kabıneti janǵan edi. Qurban bolǵandar men zardap shekkender joq. Jalyndy sóndirýge órtke qarsy qyzmetiniń 38 adamy men 11 tehnıkasy jumyldyrylǵan bolatyn.
