Almaty ákimdiginiń ǵımaraty qansha ýaqytta qalpyna keledi

ALMATY. QazAqparat - Jaıly qalalyq orta basqarmasynyń basshysy Sapar Nurashev órtten zardap shekken qalalyq ákimdik ǵımaraty qashan qalypqa keltiriletinin aıtty, dep habarlaıdy QazAqparat tilshisi.

Onyń aıtýynsha, qazirgi ýaqytta ǵımarat ishinde órt saldarynan tazartý jumystary júrgizilip jatyr. Buǵan shamamen eki-úsh kún ketedi. Jumysqa 20-ǵa jýyq jeke qurylys kompanııasy tartyldy.

Ǵımarattyń jalpy aýdany 33 myń sharshy metr.

«Qalalyq ákimdik ǵımaraty tártipsizdik kezinde órtenip, qırady. Jumys kólemi óte úlken. Sondyqtan ony 100 paıyz qaıta qalpyna keltiremiz. Qazir ishin tazalaý jumystary júrip jatyr. Tehnıkalyq tekserý júrgizý úshin barlyq salmaq túsetin qurylymdar ashyq bolýy tıis», - dedi Sapar Nurashev.

Spıkerdiń sózinshe, tehnıkalyq tekserý júrgizýge taǵy 10 kún ketedi. Osydan keıin mamandar ǵımaratty qalpyna keltirý boıynsha jobalaý-smeta qujattamasyn ázirleıdi.

Sapar Nurashev ǵımarat buzylmaýy múmkin ekenin tilge tıek etti.

«Keshe biz tekserip shyqtyq. Ǵımarat buzylmaýy múmkin. Qalpyna keltirý jumystary shamamen 5-6 aıǵa sozylady. Bıýdjet áli anyqtalǵan joq», - dedi basqarma basshysy.