Almaty ákimdiginiń aqyly turaq júıesindegi 30 paıyzdyq úlesi ne bolmaq

ALMATY. QazAqparat - Almaty qalalyq qarjy basqarmasy Almaty ákimdiginiń «AlmatySpetsTehParkıng» JShS-ndaǵy 30%-dyq memlekettik úlesi satylady degen aqparatqa qatysty túsinikteme berdi, dep habarlaıdy QazAqparat tilshisi.

Basqarmanyń habarlaýynsha, QR Úkimetiniń №1141 qaýlysymen bekitilgen 2016-2020 jyldarǵa arnalǵan jekeshelendirý keshendi jospar boıynsha Almatydaǵy 40 kommýnaldy kásiporyn jekemenshikke berilýi tıis edi.

Almaty ákimdigi birqatar kásiporynnyń qalanyń kommýnaldyq sharýashylyǵynda mańyzy óte joǵary ekenin eskere otyryp, bıliktiń «Almaty spetstehparkıng Almaty» JShS-ndaǵy 30 paıyzdyq úlesin satýdy 2020 jylǵa qaldyrýdy usynǵan bolatyn.

Olardyń ishinde «Eski úı» baǵdarlamasynyń operatorlary «Kapıtaldy qurylys kásiporny» men «Almaty turǵyn úı» kásiporyndary bar.

Úkimet ákimdiktiń «Kapıtaldy qurylys kásiporny» men «Almaty turǵyn úı» kásiporyndaryn 2020 jylǵa deıingi jekeshelendirý josparynan alyp tastaý týraly usynysyn qanaǵattandyrdy.

 «Degenmen Úkimet «Almaty spetstehparkıng Almaty» JShS-ndaǵy 30%-dyq úlesti satýdy keıinge qaldyrý usynysyn qabyldamady. Soǵan baılanysty qarjy basqarmasy 31 qazanda 2 aıǵa senimdi basqarýǵa berý úshin tender ótkizgen bolatyn»,- dedi basqarmadan.

«Memreestr» portalynda belgili bolǵandaı, bul memlekettik úlesti 75,9 mln teńgege bir uıym satyp alǵan.

Qalalyq prokýratýra atalǵan mámileniń zańdylyǵyna kúmán keltirdi. Sol sebepti, tender mámilesiniń zańdylyǵy sot arqyly qaralatyn bolady.

Munyń aldynda qalalyq ákimdik  Almaty ákimdigi qala basshysy Baýyrjan Baıbektiń AParking kompanııasyna qatysy bar degen aqparatty joqqa shyǵarǵan bolatyn. Ákimdik Aparking kompanııasynyń 70%-y - jekemenshik ınvestorǵa tıesili bolsa, 30% - memlekettik menshikte ekendigin aıtty.

 

Foto: liter.kz