Almaty ákimdiginde zoobaqtyń qyzmetin jaqsartý boıynsha komıssııa quryldy
ALMATY. QazAqparat - Sońǵy kezderi Almaty Zoobaǵyndaǵy ańdardyń mezgilsiz opat bolýy men basqa da keleńsiz jaǵdaılar boıynsha BAQ betterinde túrli aqparat jarııalanyp jatyr.
Osyǵan baılanysty Almaty ákimdiginde zoobaqtyń qyzmetin jaqsartý boıynsha komıssııa quryldy. Arnaıy jumys toby qala ákimi, «Nur Otan» partııasy Almaty qalalyq fılıalynyń tóraǵasy Baýyrjan Baıbektiń tapsyrmasymen zoobaqtyń tutastaı qyzmetin jaqsartý maqsatynda shuǵyl sharalar iske asyrylady.
Quramyna máslıhat depýtattary men qoǵamdyq komıssııa músheleri, «Nur Otan» partııasynyń músheleri engen arnaıy jumys toby tıisti memlekettik mekemelerdiń basshylarymen, «Almaty Zoobaǵyna áleýmettik kómek qory» JQ qyzmetkerlerimen birge zoobaq aýmaǵynda birneshe ret kóshpeli keńes ótkizdi. Nátıjesinde birqatar kúrdeli máseleler qalalyq ákimdiktiń aralasýymen oń sheshilip, júıeli jumystar tizbegi qolǵa alyndy.
Erteń 12-00-de máslıhat depýtattary, Almaty qalalyq Qoǵamdyq komıssııasynyń músheleri, Zoobaq pen «Almaty Zoobaǵyna áleýmettik kómek qory» JQ basshylary, taǵy basqa jaýapty mekemelerdiń ókilderi qatysýymen Jumysshy komıssııanyń keńeıtilgen otyrysy ótedi. Otyrys barysynda Zoobaq qyzmetin damytýǵa jáne ashyqtyq pen jaýapkershilikti kúsheıtýge baǵyttalǵan jumystar nátıjesi týraly jaýapty qyzmetkerlerdiń esebi tyńdalady.
