Almaty ákimdigi jumysyn ýaqytynda bitirmegen merdigerler ústinen sotqa talap aryz berdi
Ákimdiktiń baspasóz qyzmetiniń málimetinshe, belgilengen kesteden qalyp qoıǵan merdigerler zań aldynda jaýap beredi.
«Almaty ákimi Erbolat Dosaevtyń tapsyrmasy boıynsha kópqabatty «Jas Qanat» turǵyn úı kesheniń qurylysyna jaýapty – «Hadid» jáne «Promkomplekt» B kompanııalaryna qatysty is sotta qaralýda. Sonymen qatar, turǵyn úı kesheniniń aınalasyn abattandyrýdy óz moınyna alǵan «SK ShAH» JShS qatysty talap- aryz ázirlenýde», - dep habarlady ákimdikten.
Ákimdik atqarylmaǵan jumystardyń ótemin qaıtarýdy jáne olardy memlekettik satyp alý merzimin buzǵany ári jumystardy sapasyz atqarǵany úshin jaýapsyz dep tanýdy talap etedi.
«Qazir «Jas Qanat» kóppáterli turǵyn úı keshenindegi 41 úıdiń 30-y paıdalanýǵa berildi. Taǵy 11 merdiger úıdi kezeń-kezeńimen tapsyrýdy josparlap otyr. Olardyń belgilengen kesteden artta qalýyna týra 1 jyl toldy», - delingen ákimdik taratqan habarlamada.
Kórshi shaǵyn aýdandardaǵy ınjenerlik kommýnıkatsııalarǵa jaýapty merdigerlermen ákimdik arasyndaǵy araqatynas ta sot arqyly sheshiletin bolady.
«Jas Qanat» shaǵyn aýdanynda sý qubyry men káriz salý úshin tıisti qarjyny alǵan «Jasyl El Qurylys» uıymy josyqsyz dep tanyldy. Ákimdik «Kompanııa Nýraı Stroıdy» sotqa berý úshin talap aryz daıyndap jatyr. Merdiger «Nurshashkan» shaǵyn aýdanynda kommýnıkatsııamen aınalysqan. Aıyna 30-dan astam apat, asfaltbeton jabynyndaǵy keleńsizdikter kompanııanyń jumysty sapasyz atqarǵanyn kórsetedi», - dep atap ótti ákimdiktiń baspasóz qyzmetinen.
Almaty ákimi qurylys nysandaryn aralaý barysynda sapasy tómen materıaldardy paıdalanýǵa, jumysqa nemketti qaraýǵa bolmaıtyndyǵyna jiti nazar aýdardy: qalada óz mindetterine jaýapsyz qaraǵan merdigerlermen kelisim jasalmaıdy.