Almaty ákimdigi juqpaly aýrýlar aýrýhanasynan túsirilgen vıdeoǵa qatysty túsinikteme berdi
ALMATY. QazAqparat – Áleýmettik jelide Almatydaǵy 280 tósek-orynǵa arnalǵan modýldi ınfektsııalyq aýrýhananyń basqa jaqqa kóshirilip jatqany týraly vıdeo tarady. Osyǵan baılanysty qalanyń qoǵamdyq densaýlyq saqtaý basqarmasy jaýap berdi, dep habarlaıdy QazAqparat.
Modýldi ınfektsııalyq aýrýhanany kóshirý týraly aqparat Instagram -da paıda boldy. Onda emdeý mekemesinde jatqan naýqastar basqa aýrýhanaǵa aýystyralatyny týraly aıtylǵan.
Óz kezeginde, Almaty qalalyq qoǵamdyq densaýlyq saqtaý basqarmasy I.Jekenova atyndaǵy qalalyq klınıkalyq ınfektsııalyq aýrýhanasy sáýir aıynan bastap osy ýaqytqa deıin jumys istep kele jatqanyn jáne ǵımaratta jalpy sanıtarlyq-dezınfektsııalyq jumystar júrgizý qajet ekenin habarlady.
«Almatyda 500 oryndy RV-90 jańa ınfektsııalyq aýrýhana daıyn. Osyǵan oraı statsıonarlyq klınıkada sanıtarlyq-dezınfektsııalyq jumystar júrgizý týraly sheshim qabyldandy, óıtkeni ınfektsııa óte juqpaly. Barlyq jabdyqtar modýldik ınfektsııalyq aýrýhanada qalady. Jańa fılıalda barlyq qajetti medıtsınalyq jabdyqtar bar. Modýldik klınıkanyń patsıentteri men medıtsına qyzmetkerleri RV-90 – daǵy fılıalǵa aýysady»,– dedi Almaty qalalyq Qoǵamdyq densaýlyq saqtaý basqarmasy bastyǵynyń mindetin ýaqytsha atqarýshy Janar Madeeva.
