Almaty ákimdigi jol apatynan bolatyn ólim-jitimdi azaıtýdy kózdep otyr

ALMATY. QazAqparat - Almatyda 2021 jylǵa deıingi jol qaýipsizdigin arttyrýǵa jáne jol-kólik oqıǵasy kezinde bolatyn ólim-jitimdi azaıtýǵa baǵyttalǵan is-qımyl jospary jasaldy jáne bekitildi, dep habarlaıdy QazAqparat tilshisi.

Qalada 2016 jyldan beri qoǵamdyq kólikti keshendi reformalaý júzege asyp jatyr. Atap aıtqanda, jaıaý júrginshi aımaǵy, velosıped joldary jelisi ulǵaıdy. Kúre joldarda jyldamdyq barysy tómendeýde. Statıstıkalyq málimetke sensek, osy naqty sharalardyń arqasynda jol apaty kezinde bolatyn adam ólimi azaıdy.

Mysaly, 2018 jyly qala joldarynda 133 adam qaza tapsa, 5200 adam túrli jaraqat aldy. Sondyqtan Almaty ákimi Baýyrjan Baıbek qalalyq Mobıldilik basqarmasyna úzdik álemdik praktıkany eskere otyryp, joldarda adam qazasy men jaraqat alýdy azaıtýǵa baǵyttalǵan jospar jasaýdy tapsyrǵan edi.

Saraptama kórsetkendeı, jol apaty negizinen tórt jáne odan da kóp jolaqty kúre joldarda jıi bolady. Onyń ústine jol apatynan kóbinese jaıaý júrginshiler jaraqat alady. Vision Zero-nyń jahandyq kontseptsııasyna oraı, qalada adamdardyń qoǵamdyq kólikti paıdalanýyna basymdyq berilgeni jón. Zertteý kórsetkendeı, qoǵamdyq kólik damyǵan aýdandardyń turǵyndary avtomobıldengen ortadaǵy adamdarǵa qaraǵanda jol-kólik apatyna bes ese az ushyraıdy eken. Osy maqsatta BRT, LRTjelilerin keńeıtý jáne metro - jol-kólik oqıǵalaryn azaıtýdyń negizgi sharalary.

«Vision Zero Almaty» is-qımyl josparynda joldardyń, kóshelerdiń, túrli belgilerdiń ózgerýi jáne «Qaýipsiz qala», «Qaýipsiz kóshe», «Qaýipsiz jyldamdyq», «Qaýipsiz qoǵamdyq kólik», «Jol qozǵalysyn baqylaýdyń ıntellektýaldy júıesi», «Barlyq qyzmetterdi úılestirý» jáne basqa qadamdar kórinis tapqan. Bekitilgen is-qımyl jospary negizinde jańa ádisterdi engizý arqasynda jaıaý júrginshiniń qaýipsizdigi artady. Jaıaý júrginshiniń ótpeli joldaryna dıodty jaryq shamdary, al adamdar kóp jınalatyn ótpeli jerlerge knopkaly baǵdarshamdar ornatylady, baǵdarshamdarǵa jasyl fazany erte kórsetetin qosymsha bekitiledi.

Budan ózge, jyljymaly sostavtyń qozǵalys ýaqytyn qysqartý esebinen qoǵamdyq kólikti paıdalanatyndar sany artady jáne qoǵamdyq kóliktiń jolaǵy ulǵaıady. Velosıped joldarynyń jelisi artady jáne kólik jáne velosıped qozǵalysynyń arajigin ajyratý úshin barer qoıylady.

Múmkindigi shekteýli jandardyń qozǵalysy yńǵaıly bolýy úshin qoǵamdyq kólik pen jaıly ortanyń qoljetimdiligine erekshe nazar aýdarylady.