Almaty ákimdigi jaýyn sýyna tolǵan aryqtardy tazalaýdy bastady
ALMATY. QazAqparat - Almaty ákimdigi sý basqan kóshelerdi tazalaı bastady, dep habarlaıdy QazAqparat tilshisi.
«Qazirgi tańda kommýnaldy qyzmet ókilderi Alataý aýdanyndaǵy Shosseınaıa kóshesinde, Áýezov aýdanyndaǵy Tóle bı kóshesindegi «Car City» saýda úıiniń mańaıy, Bostandyq aýdanyndaǵy Rozybakıev - Tımırıazev kósheleriniń qıylysy, Abaı men Masanchı, Seıfýllın kósheleriniń qıylystary, Jetisý aýdanyndaǵy Raıymbek pen Bókeıhanov, Seıfýllın kósheleriniń qıylysyndaǵy joldar, Medeý aýdanyndaǵy Esenberlın-Ormanov-Vodnaıa-Bógenbaı batyr kóshesindegi Jarbulaq ózeniniń boıy, Naýryzbaı aýdanyndaǵy Mustafın, Áshimov, Qulybekov kósheleriniń boıyndaǵy sýdy sorǵyta bastady», - dedi ákimdiktiń baspasóz qyzmetinen.
Aıta keteıik, Almatyda tolassyz jaýǵan jaýynnan aryqtar sýǵa tolyp, birneshe kósheni sý basqan bolatyn .
Turǵyndar áleýmettik jelide basseınge aınalǵan kóshelerdiń sýretterin jarııalaı bastady.
Birneshe kólik jol shetindegi aryqtarǵa, shuńqyrlarǵa túsip ketken. Atap aıtqanda Tóle bı-Momyshuly kósheleriniń qıylysynda Gazel júk kóligi aryqqa bir dóńgelegimen túsip ketken edi.
Qalanyń keıbir kóshelerinde jaýynnan úlken keptelister paıda boldy.
