Almaty ákimdigi jastardy qoldaýǵa 7,2 mlrd. teńge bóldi
ALMATY. QazAqparat - Almatyda «Jastardy qoldaýdyń jol kartasy 2020» baǵdarlamasyn júzege asyrýǵa 7,2 mlrd teńge bólindi. Bul týraly qala ákimi Baýyrjan Baıbek «Sátti qadam» jobasy barysynda ótken bos oryndar jármeńkesinde aıtty.
Shahar basshysy jastar Almaty ekonomıkasynyń draıveri ekendigin atap ótti.
«Elbasynyń tapsyrmasymen 2017 jyl Almatyda jastar jyly dep jarııalandy. «Jastardy qoldaýdyń jol kartasyn» qabyldadyq. Onyń basty maqsaty jastardyń jan-jaqty damýyna yqpal etý. Onyń ishinde jastardy jumyspen qamtý máselesi óte ózekti bolǵandyqtan, bul salaǵa bólinetin qarjyny 5 esege arttyrdyq. Bıyl 5 mlrd teńge bólinedi», - dedi Baýyrjan Baıbek.
Onyń aıtýynsha, Jol kartasyn júzege asyrýǵa 7,2 mlrd teńge bólinedi.
Qarjy burynǵy tramvaı deposynyń ornynda boı kóteretin Loft-ortalyqtyń qurylysyna baǵyttalmaq.
Atalǵan ortalyqta 25 jastar uıymy, kitaphana, kovorkıng, jumyspen qamtý ortalyǵy, mansap ortalyǵy jumys jasaıtyn bolady.
Sondaı-aq, jol kartasy aıasynda «Turǵynúı qurylysjınaq banki» AQ men birge jastarǵa jeńildikpen úı alyp berý múmkindigi qarastyrylyp jatyr.
Almaty ákimdigi bıyl jastarǵa arnalǵan jataqhana qurylysyna 3,7 mlrd teńge bólip otyr. Bıyldyń ózinde 320 jas otbasyǵa baspana alyp berý josparlanǵan.
Qala basshysy málimdegendeı, bıyl jastar tájirıbesine 500 mln teńge qosymsha qarastyrylǵan.
Bıyldyń ózinde jumyssyz azamattarǵa mıkronesıe berýge 1 mlrd teńge qarastyrylǵan. Ár azamat 18 mln teńgege deıin nesıe ala alady. Sondaı-aq, «Barshaǵa ortaq kásiptik bilim berý» jobasy aıasynda 8 myń jumyssyz azamat tegin bilim alady.
Aıta ketý kerek, bos oryndar jármeńkesinde 100 astam jumys berýshi 5 myńǵa jýyq bos oryn usyndy.
