Almaty ákimdigi turǵyndardyń úreıin ushyrǵan kóriniske qatysty jaǵdaıdy túsindirdi

ALMATY. QazAqparat - 20 aqpan kúni Almatyda Toqtabaev pen Súleımenov kósheleriniń qıylysynda jınalǵan bir top adam aıqaılap, qaýipsizdik qyzmetkerlerin uryp-soqqan. Muny kórgen turǵyndar úreılenip, sol mańnan tezirek ketýge tyrysqan. Osyǵan baılanysty jergilikti bılik jaǵdaıdy túsindirdi, dep habarlaıdy QazAqparat tilshisi.

Onyń vıdeosy áleýmettik jelide tarady.

Beınejazbadan bir top adamnyń kósheniń ortasynda kele jatqanyn kórýge bolady. Olardyń qolynda temir qalqan men taıaq boldy.

Al mundaı qorqynyshty kórinisti kórgen turǵyndar shoshyp ketti. Júrgizýshiler jol erejesin buzyp, sol mańnan tezirek ketýge asyqty.

Keıinnen munyń bári túsirilim úshin jasalǵany anyqtaldy.

Alaıda «Cultburo» JShS qańtar aıyndaǵy oqıǵalar týraly rolık túsirýge resmı ruqsat almaǵan.

Ákimdiktiń baspasóz qyzmetiniń málimetinshe, 1 aqpanda Almaty qalasy ákiminiń, Áýezov aýdany ákiminiń jáne polıtsııa departamentiniń atyna «Cultburo» JShS-nen 13 aqpanda «Habar» telearnasynyń tapsyrysy boıynsha qańtardaǵy oqıǵalar taqyrybyna áleýmettik rolık túsirýge ruqsat berý týraly ótinish kelip túsken.

Atalǵan ótinish boıynsha Qoǵamdyq damý basqarmasynyń mamandary ótinish avtorlarymen túsindirý jumystaryn júrgizdi jáne olardy túsirilim júrgizýge ruqsat berilmegeni týraly habardar etti. Polıtsııa departamentinen de esh ruqsat berilmegen.

Alaıda, rolık túsirýge tyıym salynǵanyna qaramastan, «Cultburo» JShS aǵymdaǵy jyldyń 20 aqpanynda beınerolık túsirgen.