Almaty ákimdigi turǵyndardy zańsyz salynyp jatqan turǵyn úı keshenderinen páter satyp almaýǵa shaqyrdy

ALMATY. QazAqparat- «Qaraǵaıly» shaǵyn aýdanyndaǵy «Frantsýzskıı dom» turǵyn úı kesheni ruqsatsyz salynyp jatyr. Bul týraly Almaty qalasynyń ákimdigi málám etti, dep habarlaıdy QazAqparat tilshisi.

Ákimdik taratqan derekke sensek, menshik ıesi sharýa qojalyǵyn júrgizýge arnalǵan jer teliminde turǵyn úı keshenin salyp jatyr.

«Qala qurylysyn baqylaý basqarmasy shilde aıynda nysandy jospardan tys tekserý qorytyndysy boıynsha menshik ıesi ÁQBtK-niń 316-baptyń 1-bóligi, 321-bap boıynsha jaýapqa tartyldy, sonymen qatar, atalǵan zań buzýshylyqty 19 qazanǵa deıin joıý týraly buıryq shyǵaryldy. Buıryq merzimi ótken soń ony oryndaý úshin qaıta tekserý taǵaıyndaldy, qazir qujattary prokýratýrada tirkeýden ótýde»,- delingen habarlamada.

Sonymen birge, basqarma qurylys-montaj jumystaryn júrgizýge jáne salynyp jatqan jyljymaıtyn múlikti satýǵa aldyn ala shart jasasýǵa tyıym salý týraly talap-aryzdy sotqa joldady.

«Aıta ketsek, basqarma [phone] nómirli senim telefonyn iske qosty, bul arqyly jyljymaıtyn múlikti satyp almas buryn salynyp jatqan turǵyn úı kesheni qujattarynyń bar-joǵyn tekserýge bolady»,- dep atap ótti qalalyq ákmidikten.

Buǵan deıin Almatynyń Naýryzbaı aýdanyndaǵy zańsyz salynǵan «Jaısan» turǵyn úı kesheniniń súriletini týraly jazǵan edik.

Keıin almatylyqtar ákimnen «Jaısan» turǵyn úı keshenin buzbaýdy surady.