Almaty ákimdigi turǵyn úı kesheniniń qurylysyn toqtatty
ALMATY. QazAqparat - Almaty ákimdigi burynǵy «jemis konservi kombınaty» aýmaǵyndaǵy qurylys jobasyn toqtatty. Buǵan deıin qala turǵyndary osy aýdanda 57 kópqabatty úıden turatyn turǵyn úı kesheniniń qurylysyna shaǵymdanǵan bolatyn, dep habarlaıdy QazAqparat tilshisi.
Qalalyq josparlaý jáne ýrbanıstıka basqarmasy baspasóz qyzmetiniń habarlaýynsha, O. Jandosov kóshesi № 94, № 94/16, № 94/8; Á. Kekilbaıuly kóshesi № 6; 20-lınııa kóshesi № 39 mekenjaıyndaǵy qurylys toqtatyldy.
«Halyqqa qyzmet kórsetý obektileri bar kóppáterli turǵyn úı keshenin salýǵa arnalǵan jobalaý aldyndaǵy qujattama keri qaıtaryp alyndy.Basqarmanyń usynysy boıynsha qurylys salýshy qurylys tyǵyzdyǵyn, qalalyq ınjenerlik jelilerge túsetin júktemeni eskere otyryp, jańa eskızdik jobany ázirleıdi jáne usynady. Qujat jobasy barlyq qajetti protsedýralardan, sonyń ishinde qoǵamdyq talqylaýlardan ótedi»,-dep habarlady basqarmadan.
Budan basqa, qurylys salýshy eskızdik jobada áleýmettik nysandar, onyń ishinde jalpy bilim berý mekemeleri men mektepke deıingi bilim berý nysannyń bolýyn kózdeýi qajet.
«Osylaısha, atalǵan Almaty aýdanyndaǵy qurylysqa jol berilmeıdi»,-dep atap ótti qalalyq josparlaý jáne ýrbanıstıka basqarmasy.
