Almaty ákimdigi tolassyz jaýǵan qarmen kúresti jalǵastyrýda
ALMATY. QazAqparat – Almaty ákimdigi kóshelerdi qardan tazartý boıynsha júrgizilip jatqan sharalar týraly aıtty, dep habarlaıdy QazAqparat.
Almatyda ekinshi táýlik qar men jańbyr jaýyp tur. Tańerteńgi jaǵdaı boıynsha, taýly aýmaqtarda 45 sm qar jatty. Qalanyń ishinde aýa temperatýrasynyń joǵary bolýyna oraı qar jamylǵysynyń qalyńdyǵy 4 sm-dan aspaıdy.
«Kóktaıǵaqqa qarsy materıaldardy shashý jumystary júrgizilýde. 6 jáne 7 naýryzdyń túngi ýaqytynda 1220 tonna materıal paıdalanyldy. Qardy kúreý boıynsha kolonnalar uıymdastyryldy. Taýly aýmaqtarda qardy shyǵarý jumystary júrgizilýde. Onymen bir mezgilde trotýarlar, jaıaý júrginshiler joly, qoǵamdyq kólik aıaldamalary, kólik turaqtary tazartylýda», - dedi ákimdikten.
Qar saldaryn joıýǵa 566 tehnıka jáne 1400 den astam jol jumyskeri jumyldyrylǵan.
Qala jáne aýdandardyń ákimdikterinde qardy jınaý jumystaryn baqylaý boıynsha táýlik boıǵy kezekshilik uıymdastyryldy.
«Qazgıdromet» RMK boljamynsha, qardyń jaýýy búgin, 7 naýryzda toqtaýy tıis. Qazirgi aýa temperatýrasy 2, -7 gradýs.
