Almaty ákimdigi tıktokerlerge beınebaıan túsirýge yńǵaıly oryn usynady
ALMATY. QazAqparat - Almaty ákimi Baqytjan Saǵyntaev tıktokerlermen birge tanymal jastar baǵytyn qoldaý men ony damytý máselelerin talqylady, dep habarlaıdy QazAqparat tilshisi.
«Kreatıvti ındýstrııany damytý strategııasy aıasynda jastardyń ózin-ózi tanytýy úshin jaǵdaı jasaıtyn bolamyz. Almatynyń tórtten bir bóligi 18 jasqa deıingi jastar ekeni belgili. Joǵary oqý oryndarynda 168 myń stýdent, kolledjde 68 myń stýdent bilim alady» - dep jazdy B.Saǵyntaev Instagram paraqshasynda.
Qala basshysynyń aıtýynsha, bizdegi haýstar (tıktoker komandasy - avt)10 myń adam ishinen álem boıynsha 2-3-shi oryn alady. Tanymal TikTok haýster tıktokerleri men prodıýserleri tájirıbe almasýǵa daıyn, damýǵa, sondaı-aq jańadan kelgenderdiń shyǵarmashylyǵyn monetızatsııalaýǵa kómektesýge daıyn.
Al ákimdik tarapynan jaıly jaǵdaı jasaý nemese beınebaıan túsirýge yńǵaıly oryn usyný boıynsha kómek kórsetiletin bolady.
Baqytjan Saǵyntaev óz jazbasynda tanymal TikTok juldyzdarynyń qala ómirine at salysyp, Almatynyń týrıstik brendin qalyptastyryp, damytýǵa, súıikti qalamyz týraly álemge jar salyp, qalalyq qoǵamdastyqtyń ózekti máselelerin sheshýge kómektesýge daıyn ekendigi qýantatynyn aıtty.
Dýman Arǵyngeldi
