Almaty ákimdigi Teńiz kenishinen oralǵan qyzmetkerlerdiń shaǵymyna jaýap berdi
ALMATY. QazAqparat – Almaty ákimdigi Teńizden kelgen qyzmetkerlerdi úı karantınine jibermeı, jataqhanaǵa oqshaýlaý sebebin túsindirdi, dep habarlaıdy QazAqparat tilshisi.
Keshe 200 vahtalyq qyzmetker Atyraý oblysynan arnaıy reıspen oralǵan bolatyn.
Teńiz kenishiniń qyzmetkerleri búgin úı karantınine jibermedi dep BAQ ókilderine shaǵymdandy.
Olar Atyraýdan shyǵarda koronavırýsqa test tapsyrǵan. Jumyskerlerdiń paıymdaýynsha, qaıta-qaıta analız tapsyrýdyń qajetti joq.
Qalalyq ákimdiktiń habarlaýynsha, olar jataqhanada medıtsınalyq qyzmetkerlerdiń baqylaýynda bolmaq.
«Olar Qurmanǵazy 113 a mekenjaıynda ornalasqan Qazaq Ulttyq medıtsınalyq ýnıversıtetiniń jataqhanasyna jatqyzyldy. Osy ýnıversıtet klınıkasynyń dárigerleri olardyń densaýlyǵyn baqylaıtyn bolady. Áý bastan úılerine jiberiledi degen aqparat bolǵan joq. Kelgender 1-2 kún karantınde oqshaýlanyp, PTsR test tapsyryp, nátıjesi teris shyqqan jaǵdaıda ǵana 14 kúnge úı karantınine jiberiledi», - dedi ákimdikten.
Qalalyq Qoǵamdyq densaýlyq saqtaý basqarmasynyń habarlaýynsha, 200 adamnan bir ýaqytta analız alý birshama ýaqytty alady.
Qala ákiminiń birinshi orynbasary Erlan Qojaǵapanov munyń aldynda Atyraýdan kelgen «Teńizshevroıl» JShS qyzmetkerleri karantınge jatqyzylatynyn aıtqan bolatyn. Munyń aldynda jetkizilgen bortta bir qyzmetkerden vırýs tabylǵan.
