Almaty ákimdigi tasymaldaýshy kompanııalarǵa 4 mlrd teńge qaryz

«Mádına» avtoparkiniń dırektory Bekejan Tynyshtyqbadyń aıtýynsha, ákimdik sýbsıdııa tóleýdi jyl basynan beri keshiktirip jatyr.

«Ákimdiktiń tapsyrysy boıynsha biz, jeke kólik parkteri, avtobýstardy 100% jańarttyq. Nesıe alyp, olardy lızıngke satyp aldyq. Ákimdik bizdiń málimetterimiz boıynsha sýbsıdııalardyń jańa esepteýlerin maquldamady.

Avtobýs parkteri janarmaı, qosalqy bólshekter satyp alý men jumysshylarǵa jalaqy tóleýde qıyndyqtarǵa tap boldy. Qazir bizge jańa gazben qozǵalatyn avtobýstar satyp alyńdar dep jatyr, biraq biz qazirgi nesıeni tóleı almaı otyrmyz. Byltyr jolaýshylar aǵyny men sýbsıdııa tólemderi az boldy. Bıyl jolaýshylar sany kóbeıdi. Al ákimdik bizge sýbsıdııa tóleı almaı jatyr», - deıdi ol.

Sonymen qatar, ol kompanııa qaryzǵa batqanyn tilge tıek etti.

«Olar ótken jyly 22 mlrd teńge sýbsıdııa tóledik dep otyr. Alaıda, bıyl bul soma kem degende eki esege ósti. Biz ony byltyr jolaýshylar aǵyny az bolǵanymen túsindirdik, bıyl olardyń sany kóbeıdi. Sonymen qatar, jańa avtobýstar men jańa marshrýttar paıda boldy», - dedi ol.

«City Bus» JShS dırektory Egor Jıglov 2020 jyl tasymaldaýshy kompanııalar úshin qıyn bolǵanyn atap ótti.

«Sýbsıdııa tóleý merzimin keıinge qaldyryp, keshiktirip jatyr. Bul kompanııa jumysynyń sapasyna jáne damýyna úlken áser etedi. Bul eshqashan toqtamaıtyn óndiris. Eger biz ony ýaqytynda qarjylandyrmasaq, onda damý bolmaıdy. Avtobýstardy jóndeý sýbsıdııa tóleýge baılanysty, eger júrgizýshi ýaqytyly jalaqy almasa, ketip qalady. Bul úlken tapshylyqqa ákep soǵady», - dedi ol.

Óz kezeginde, Almaty qalalyq mobıldilik basqarmasy bastyǵynyń orynbasary Symbat Myrzaǵulov tólemderdiń ne sebepti keshiktirilip jatqanyn túsindirdi.

«Bizde únemi kidirister bolmaıdy. Avtoparkter jumysyn toqtatatyndaı eshteńe joq. Biz qazir qaıta eseptep, tekserip jatyrmyz, tekserý áli aıaqtalǵan joq. Aıaqtalǵannan keıin biz bárin usynatyn bolamyz. Avtoparkter aqshasyz qalǵan joq, biz olarǵa aqsha tólep jatyrmyz, sýbsıdııa tóleımiz, olar bıletterden de qarjy taýyp otyr», - dep túsindirdi ol.

Onyń aıtýynsha, tasymaldaýshylarǵa sýbsıdııanyń 50% tólenedi, sondyqtan olar aqshasyz otyrǵan joq.

«Avtobýs parkteriniń jumysy toqtamaıdy. Biz oǵan jol bermeımiz. Qaryz shamamen 4 mlrd teńge. Ótken jyly jolaýshylar aǵyny naýryz aıynan bastap tómendedi, biraq qarasha aıynda biz 2019 jyldyń kórsetkishterine jettik. Jumys kúnderi bizdiń jolaýshylar aǵyny shamamen 1 mln adamdy quraıdy. 2019 jyly bul 1,2 nemese 1,1 mln boldy. Sebebi, qazir oqýshylar men stýdentter joq»,- dedi basqarma basshysynyń orynbasary.

Onyń aıtýynsha, qalada avtobýs tapshylyǵy shamamen 700-1000 avtobýs.