Almaty ákimdigi shaǵyn bıznestiń jaldaý aqysyn toqtatty
ALMATY. QazAqparat – Almaty óńirlik kommýnıkatsııalar qyzmeti alańynda ótken onlaın brıfıng barysynda Almaty qalasy Memlekettik aktıvter basqarmasynyń basshysy Rústem Álıev shaǵyn jáne orta bıznesti qoldaý sharalary týraly aıtyp berdi, dep habarlaıdy QazAqparat tilshisi.
QR Prezıdenti Qasym-Jomart Toqaevtyń shaǵyn jáne orta bıznesti qoldaý jáne damytý jónindegi tapsyrmasyna sáıkes, Almaty qalasynyń ákimdigi bıyl 20 naýryz ben 19 maýsym aralyǵynda shaǵyn jáne orta bıznes ókilderimen kommýnaldyq menshik nysandaryndaǵy ǵımarattardy jalǵa alýdyń 612 sharty boıynsha jaldaý tólemderin toqtatty.
Sondaı-aq, Memleket basshysynyń 2020 jylǵy 1 qyrkúıektegi joldaýynda memlekettik organdar men kvazımemlekettik sektorǵa tıesili jyljymaıtyn múlik obektileri boıynsha shaǵyn orta bıznes úshin jaldaý aqysyn esepteýdi 1 qyrkúıekten bastap 2020 jyldyń sońyna deıin toqtata turý aıtylǵan bolatyn.
Osyǵan baılanysty 1 qyrkúıekten bastap 2020 jyldyń sońyna deıin Almaty qalasy ákimdiginiń ShOB jalǵa alýshylarymen 499 jaldaý sharty boıynsha esepteý toqtatyldy. Bıyl jaldaý tólemderin toqtata turýǵa 420 ótinim berildi.
2020 jylǵy 9 qazanda shaǵyn jáne orta bıznes sýbektileri úshin 2020 jylǵy 20 maýsym men 31 jeltoqsan aralyǵyndaǵy memlekettik múlikti múliktik jaldaýǵa berý qaǵıdalaryna ózgerister engizildi. Osynyń aıasynda jaldaý tólemderin toqtata turýǵa 140 ótinim berildi, onyń ishinde 124-i óńdeldi.
«Tsıfrlyq Qazaqstan» memlekettik baǵdarlamasyn iske asyrý sheńberinde, Basqarma memlekettik múlikti jalǵa berý boıynsha barlyq suraqtarǵa jaýap bere alatyn Telegram-da @CSA_Almaty_bot vırtýaldy konsýltantyn iske qosty.
